قصيدة جديدة
من (الكارو)ل (تاركو)
.......شعر هاشم صديق
جّات من الله يازول الله
ود (صديق)و(بت جنة)
من( الكارو)ل (تاركو)؟!
من الحفرة للقمه؟!
من الوحشه للّمة؟!
من الكتمه للنسمه؟!
من الصنّه للرنّة؟!
......................
محل ماتمشي تلقي الناس
أصيل شعبك
عسل مخلوط مع الأناناس
يضمك زول الي صدرو
لابتعرفو لاشوفتو
يقوم نفسك من الضّمه
تقع من راسك العِمه
يجيش صدرك من الأحساس
تطير روحك
ترفرف يابا في (الأُوراس)
تَرِك جزلانه في القِمة
......................
......................
تدخُل بيت أصيل وجميل
رحيم وحبيب
تلاقي الونسه والإلفه
تلاقي النكته والضحكه
عصير منقي
كبابي الشاي و بالنعناع
كمان القهوة بالقرفه
.....................
ويوم جمعه
تجيك قراصه بالدمعه
صحن مردوم بطعميه
وسرويس ضاجّي باللحمه
سلطة روب تقول الروب
خلطة دكوة بالشطه
......................
ست البيت تخت في خشمك اللقمة
وسيد البيت يردم ليك في الطعمية واللحمه
يموت حيلك من التخمه
ويسيل دمعك من الإلفه
تقوم طفلة
تمد ايدينا بمنديل
تقُش دمك
تَجِر ل جوة ب خفة
تجيك راجعة
في إيدينا شايه فتيل
ترشك يابا كم رشّه
تضِج اللّمه بضحكه
..................
من الدهشة تقرص روحك المبهورة كم قرصه
تقول ياربي ديل ناساً من المريخ
ولا كمان زماااااان عِرفه
..................
..................
هي جات من الله يامسكين وزول الله
من (الكارو) ل (تاركو)
من الحفرة للقمه
من الصّنه للرنّه
من الكتمه للنسمه
.................
غريب أنت وعجيب زمنك
ناس حسدوك في الكارو
وناس نهشوك في( تاركو)
وناس إتفلسفو وثارو
وناس بالخجلة إتضارو
.....
منو الأداك حق لقمة
منو الفقدك وكت غُمه
منو النصرك وكت أزمه
من الأهداك يوم(رقشه)
...................
...................
...................
صبور انت
لابتموت من الدهشه
لا بتجهش من الحسره
معاك شعبك
معاك وطنك
عدييييييل ختيتو في الذمه.
٢٥أكتوبر ٢٠٢٣
أبوظبي
ليست هناك تعليقات:
إرسال تعليق