في قعر راكوبة ست الشاي (( جمبت ستنا )) .الحلقة ( 12)
{ نجيوه الحليوه بت الباريا. }
ست الشاي ب (( حوض)) سمسارة سوق الوحده بالحاج يوسف( سوق سته) . سوق حارننا وحدتنا.
نجيوه مهوقنيه رشيقه من اثنية الباربا من جنوبنا ( المملوخ) ببصير يبصر بطشاش النظر من قرب ، لكن غدا" سينجبر ( الفكك) ويتعافى الجسد . !!
تزوجت نجيوه بعباس عباس الجبال جندي ( الديش) ، وانجبت له وحيدها ، فأغتيل عباس عندما احتدمى الوغي بطلق غادر اتاه من ظهره في تلك الحرب الملعونه ، فنزحت شمالا" بحثا" عن اعمام صغيرها واهله .
ووجدت ضآلتها بالحاج يوسف الوحده ( كرتون كسلا) ، أشهر قلاع الغبش الصامده على اطراف رصيف بنادر كرش الفيل ( سنتر الخرطوم).
إمتهنت نجيوه بيع الشاي في (( الحوض)) مستنقع سمساره (سوق سته ) بالحاج يوسف الوحده ، وقاع البلبطه والعوم والغرق .
نجيوه مليحه وخفبفة الظل والدم وظريفة المحيا ،وتنداح النكته وتعليقاتها الساخره العفوية البديهه بنكهة عربي جوبا .
وتمتزج في كيمياء نادره ( فلته) بعبق ماء كفتيرتها المتبل المتكثف ، ويلتف حولها الزبائن كالنحل يتزاحم لأمتصاص رحيق اطيب الزهور
و تمن عليهم بشذى ماء كفتيرتها المتبل ورحيق شرابها ( الشاي والقهوه والحلبه والجنزبيل والكركدي ( الانقارا) والحليب والشاي حليب ( شآآآآي آآليب ) كما يحلو لابنوسى جنوبنا . سائغا" للشاربين.
وعندما يشنف آذن مسجد حي الوحده العتيق الذي يقع في مربع (3) الركن الشمالي الشرقي للسوق ويقع ( الحوض) غربه مباشرة والذي اسسه جيل السماسره الاوائل (( المغفور لهم عم الضوء محمد ابكر وعم ضوالبيت وعم نا م تير وعم ( عيسى قاسي )وعم يونس الحمشيش واسماعيل النيل . واطال الله اعمارهم عم ادم النجار وحامد الصادق )) ، كانت تستأذن زبائنها يكل ذوق وادب واحترام ملبية" نداء حي الصلاة حاضرا" .
ودئما" يناكفها جيل السماسره الثاني (( الفضيل محمدين ويس محمد حماد وعبدالله عيسى (النميتي) وشوقار و محمد عبدالله البعيو ومهدي صابون ومحمد ابكر (الجلك) وامبده وعبدالقادر ( قدوره عيون)وعبدالمنعم والدوش وصديق ابوه وجيش وحلوف وقرنق وجوه الجك وود المك ويوحنا واحمد كبسو وابراهيم وعيسى عنكبه وسليمان صلاح الدين واحمد كلوش والريحه وجابر وعزالدين والشيخ عبدالله وعامر وحريحر وعم مهدي ومهدي ...الخ)).
ويمازحونها يآآآآآآ نجيوه لقينا ليك عريس كآآآآآآرب .
فتضحك ساخره وتقول ليهم. :
انتو قايلني انا بآآآآآيره ولا شنو .
هيييي ييييآآآآ .
والله الواقفين في الصف كتآآآآر .
لكن انا زولى واحد وبس .
زول اخضر وطويل وقيافه .
جُلكامه الحلو كلاما .
وانتم عارفينوا كويس .
وعارفين املاكي من اراضي ودكاكين في الخرطوم وما خفى في جوبااعظم اراضى واملاك واطيان .
وانا وهبت نفسى دي ليهو على سنة الله ورسوله .
بس لكن . !!! .
لكن هو رافضني !!! .
ليه !!! ؟
أسالوه ؟؟؟؟.
وحينها سألوه بلسان واحد :
آهآآآآآ يآآآآ (( جلك )) رأيك شنو في كلام نجيوه ده ؟؟؟؟؟؟؟؟.
وكان حينها (( جُلكامه )) أشهر عذاب السوق و حارتنا وحدتنا .
فيرد بسخريته اللاذعه وصوته الفخيم الجهور بمراوغة وزوغة حريف :
أنا يا اخوانا نجيوه الحليوه دي ما مآآآآآبيها .بس أنا مشكلتي مع اعمام وحيدها (( وليدها)) .
ناس صديق ابوه ديل لاعبين لي بآآآآكات في السوق والحاره .
وديل هكرز لاهطين مني اي قطعة ارض بيع او شراء او ايجار ،.
وفي تشجيع كرة القدم المستديره هم مريخاب.
وانا هلالابي ( ابوشنب).
وفي اندية حارتنا وحدتنا هم بيشجعوا الرفاق.
وانا بشجع المنتصر.
ولمن اتزوج نجيوه الحليوه دي راح يجو لزيارة ود اخوهم ده .
وراح يكرهوني العافيه ويقلقوا مضاجعي ومنامي .
وراح يكون خراب سوق بيع وإيجار وخراب وديار .
فترد نجيوه : يآآآآآآآآآ الجلك اذا كان مشكلتك الوليد ده فهي محلوله .
فهو خلاص بلغ سن الرشد وبقى رآآآآجل .
انا راح اديهوا لأعماموا ناس صديق ابوه. ديل .
واتفرد بيك وانت والقووووون.
فيضحك (( الجللك)) ويحك رأسه حائرا" .
وقائلا" : يآآآآآ نجيوه كلامك ده يعنى (( كِش جُلك )) .
فتتصاعد ضحكات السماسره والزبائن معانقة" دعاش توابل ماء الشاي والقهوه، فتتوه ضجة السوق في زحام ضحكاتهم .
وعقب توقيع اتفاقية السلام وعودة الشهيد جون قرنق ازدهرت تجارتها ونشط نشاطها وزاد مريدوها من سمرجنوينا ، ساسه عتيقون ، ومشاهير مجتمع ، وتنوقراط وزعماء عشائر كبار ، ورجال اعمال ، ومهاحري الشتات ، وموظفوا دوله ولائيون واتحاديون، وموظفون امميون و....الخ .
وتزامن حضورهم بحضور (( الجلك)) ساعة الآذن .
ونجيوه لم تلبئ نداء حي على الصلاة .
ربما منعها مانع أوحائل .
فباغتها (( الجلك)) قائلاً. لها. :
آآآآآهآآآآآ يا نجيوه عشان جون قرنق جاء انتي ارتديتي من الإسلام ورجعتي لدينك القديم ولا شنو ؟
فضحك أهلها حتى بانت نواجزهم قبل البقيه .
فصمتت نجبوه حتى تلاشت الضحكات .
ونظرت الى (( الجلك)) قائله :
يآآآآآآآآ ((الجلك)) انا قلت لنفسي يا بت مادام وهبتي نفسك (( للجلك)) لله .
ومتنازله عن المهر والصداق .
وقائمه بكل تكاليف الزواج ،.
وراح اكتب ليهوا كل املاكي اللي في الخرطوم وجوبا بأسمه ،.
وانا وكل مالي مما ملكت يمينه .
وبعد ده كلوا انته رفضتنى !
انا نجيوه دي قلت لنفسي اذا كان الاسلام بيقول كده .
أنا أفضل لي ارجع لديني القديم .
فتعالت ضحكات الحضور عاليا" ومنهم من ادمع من الضحك.
وقرقر جلك ضاحكا" و قائلاً لها :
والله يآآآآ نجيوه دى سته/صفر .
وقويه منك انتي محنه وداهيه .
فيعطي جلك الحضور و حوض السماسره عرض أكتافه .
بينما تلاحقه صيحاتهم وطعمجتهم :
شرد !
شرد !
شرد !!!
،،،، تمت،،،،
،،،،،،،،،وكن حيين بنتكاتبوا وبنتشاوفوا . ،،،،،،،،،،
✍أيوب الحويطات
"""""""""""""""""""""""" """"""""""""""""""""""
الصورة تقريبيه لزوله تشبه نجيوه الحليوه وجمبت شاهيها .في حوض سماسرة سوق حارتنا وحدتنا ( سوق سته )