الاصدقاء في رحاب الوطن الجميل الوطن العامر ومليان بي ناسو وثقافاتو. حيث ترتاح ضهاري وقيزان
، دمر وقطاطي
وكم راكوبه كم كُرفه.
حقول للحنطه مرويه
جِمال تعصر جقوقة الزيت
ونهر النيل يمد يديهو للناس التعب حالهم
ضراع مسقي وعِرق حامي.
وللرابط شراع فلوكتو للترحال
والصياد يجهز في الحبال يفتل
بهائم سارحه في النقعات تقرِم في الكلا الناشف تٓكُد عشم السنين ودنين.
وياوطني الرحابو جميل :
طنابيرن
نقاقيرن
دليب شاشاي.
شتم يقطع تِلوت الليل مع الجراري والصفقه
وصدي المردوم مع الكاتم
فنون زنجيه طقسيه
طبول غابيه هداره
ومزامير ناي مع تعريجة الوازا
دلاليك الحباب دٓقن
تراث عامر وطار نتار وسيف بتار
الكوكاب
والتوكنا
السلوكه والجرايه والمنجل
الدوباي والجابودي والمسدار
بِرِش تقروقه حُق مرواد
ده في وطني الرحابو جميل.
وصباحكم صباح الاشراق
ياوطن الجمال والنيل
ليست هناك تعليقات:
إرسال تعليق