قرية الحجاج

#سر_بساطتي_قريتي_البسيطة😊 

قرية الحجاج تقع غرب مصنع سكر سنار هي مسقط رأسي🤩 

قرية صغيرة المساحة كبيرة المكانة بقلبي  😘 أهلي ناسي حبّاني فخري وعزّتي  😍  نشأت وترعرعت فيها بمحبة كل الناس الفيها وعشت طفولتي بكل بساطة الدنيا هناك 🥰 علي الرغم من اني غادرتها لظروف الحياة لكنها دائما حاضرة في داخلي بكل تفاصيلها المميزة 😘 

الصباح فيها حاجة تشرح الصدر  بنصحي علي صوت القمري في شجر الارآك وشجر الهجليج والنيم وفتاح ياعليم رزاق ياكريم 🤗 وبعد كده بتبدا الحركة في كل القرية يعني مثلاً #أمي_فاطنة دي حبوبتي الحلوة البحبها جداًوهي بتناضم في الغنم والضان وبتقول( حي حي حي وتك تك وار ار ) الاصوات دي ياناس المدينة مابتعرفوها 🤣 انا بسمعها بإستمرار واعتدت علي سماعها وأمي عاوزة تحلب اللبن عشان شاي الصباح🤩 اللبن في الجردل لبن أصلي وهناك الكفتيرة في اللداية وتحتها (الويقود) وده البيعمل اللهبه والبتخلي الكفتيره لونها اسود منظر في مخيلتي إلي الآن  ونحن منتظرين الشاي وفي اللحظة دي هنااااك #ابوي_الصادق الله يرحمة ويغفر ليه جاي من فريق ورا شايل اللقيمات طعم الحياة والحب يشهد الله 😊  

بعد كده كلللل الحِلّة حلحلت بهايما من الزرائب عشان نقدما ونوصلا الراعي وكلها بتتشابه بس مافي زول بيشيل بهيمة زول نزاهة وقناعة 😎 ونجي راجعين ومن بعيييد بنشم ريحة الشيط حق العصيدة وبشم عند ناس حبوبة بتول الله يرحما وخالتي رشيدة ملاح الروب 😋 وعند ناس حبوبة الرحمة الله يرحما ريحة حاجة بالسمنه وعند ناس حبوبتي دخرينة الله يديها العافيه ويكاب طماطم وعند امي فاطنة بامية أم بقبق وهناااااك حبوبتي رابحة في العواسة وتقول لي الصاج ابا يقوم اجري جري ل جدو مرحوم في الجزارة جيبي لي طايوق 🤭 

المهم جوطة الفطور انتهت وكلللللنا فطرنا مع بعض وأهم حاجة صينية الديوان 🥰 عشان جدي جبارة الله يرحمة كان زول مضياااااف 😘 المهم الناس ديل كلهم اصلييييين شديد بحبو الحياة وعايشنها في ابسط حالاتها قوامها المحبة 🤩 بلد تفاصيلها بتميزها عن بقية الأمكنة 

يعني المسيد والذكر والنوبة ويوم الزيارة وبنية الشيخ حمدان  والشيخ هجو والحاوي والحفير والموليته والسينات والحفلات البعد الساعة 2صباحا ودقة الدلوكة وسوق ودالحداد وسوق ود ياسين ودكان جقدول ودكان جدي شنبول الله يرحمه وده كان ملتقي بمثابة منتدي ثقافي   ودكان حمد ودكان ود جنيد رحمة الله  تغشاة ودكان ودي  ودكان جدي الضو ربنا يرحمه ودكان موسي ود علي رحمه الله عليه ودكان موسي  ود ساسي  وبمناسبة الدكاكين ديل كنا بننتظر يرسلونا الدكان عشان نجيب سكر عشان تفتح قرطاس السكر وتسف لحد ماتصل لانه سكر المصنع ولونه احمر سكر سمح خلاص     وحاجات وتفاصيل حلوه شديد  ولا مدرستنا الكان بيدرس فيها طلاب من قرية كوش وقرية المرتفعة ومعصورين وحلة هجو والفخيخير  دي قري قريبة مننا وأستاذة #حرم😍 وأستاذ #حلينقو لهم الاحترام والتقدير 🥰  ياااااااااه بحبك يابلدنا وبحب كل الناس الفيها وعمري ما حاتنكر ليك وانتي دائما في القلب 

حجاجية وافتخر 😎 يلا المن الحجاج يسجل حضور 🥰