كيف تعرف إنك لحقت أمات طه :
لو شفت عبد الله خليل
قبل ما يبقى محطة ،
لو شفت ازهري
قبل ما يبقى صينية و حي جنوب الخرطوم ،
لو درست في الخرطوم شرق الاولية قبل ما تبقى بنك البركة
لو إتفرجت على عبدالكافى فى برى أو جيمس فى التحرير أو عبدو موسى فى النيل ،
لو حضرت حفلة الكريسماس و راس السنة فى النادي الكاثوليكي قبل ما يبقى دار المؤتمر الوطنى ،
لو رقصت مع جاز الديوم (حاجة كولن كولن باشاكه) ،
لو شربت لبن كافوري من القزاز
لو أتغديت في مقهى ومطعم أتيني ،
لو اكلت ايس كريم او طورطة من بابا كوستا بشارع الجمهورية ٠
لو حضرت حفلة لفرقة الجيلاني الواثق أو كمال كيلا أو عامر ساكس فى الكريزى هورس فى المقرن ،
لو إتفرجت علي خالد طلعت و فريد طوبيا و عادل ميرزا فى بطولة الجمهورية للتنس ،
لو إتفرجت علي وليم أندريه بلعب باسكت بول و بيغنى جاز ،
لو ساهرت فى سانت جيمس او صالة غردون للموسيقى (GMH) و اتعشيت فى أحمد سعد بود نوباوى أو أبو العباس والعشرة الكرام ،
لو شفت ممدوح بعوم ضد كيجاب و معاهم سارة جادالله ،
لو سمعت ما يطلبة المستمعون لايف ،
لو دخلت فيلم جانوار أو تسرى منزل أو عودة ديجانقو ،
لو بتتذكر طعم الدبل كولا و الشيكان كولا و جنزبيل السكة حديد ،
ولو حفلة عرسك مسجلة في شريط بيتاماكس (واطاتك اصبحت) ٠
لو اشتريت فول من اليمانى و قلت ليهو كب لينا فيهو موية جبنة ،
ولو شفت العربيه بدوروها بالمنفله (أكتب وصيتك) ..
لو إشتريت الخضار و اللحمه من زنك الخضار (مول الواحه الان) وشلتهم في القفه ،
لو دخلت سينما غرب الدور التاني
ولو سمعت الزول الراكب الحمار بكورك (المعاه صفائح المعاه قزاز) ،
لو ركبت طراحة لامدرمان من المحطه الوسطى الخرطوم ،
لو ركبت بص ابو رجيله أو بص شركة مواصلات الخرطوم ( التورماى ده ناسو فاتو زمان نخليهو) ٠
لو كنت شاطر في المدرسه ووزعوك المدارس الحكوميه واصحابك المجموعهم تعبان ودوهم المدارس الشعبية ،
لو اكلت في مطعم وقلت عاوز وصله ،
لو الحلاق عمل ليك القطعيه بالموس البسنوها بالجلد ،
لو شفت بص الورديه التانيه بتاع مصنع النسيج و بص سودانير ،
لو ردفت عشان حصة التسميع خايف من الجلد لأنك ما حافظ ،
لو عيان ومشيت المستشفي وأتعالجت وصرفت الدواء بالمجان ،
لو حبوبتك أو أمك قالو ليك أمشى جيب تكسى طلب من الظلط ،
لو قالو ليك جيب فتيل فاضى من النسوان الفارشين قدام الاسبتالية للدواء (انت كد ه كومر اصلى) .
لو رسلوك تجيب طايوق للعواسة أو ملح الاندروس بتاع الهضم و النفاخ .. (اقنع من روحك) .
* منقول مع السمكرة الجيدة مع الإعتذار للناشر الأول ٠
ليست هناك تعليقات:
إرسال تعليق