في قعر راكوبة ست الشاي جمبت ستنا الحلقة ( )
جواب في بريد رمانة ميزان قادة شباب حارتنا وحدتنا النوراني .
آية الله نوراني .
كيفنك زعيمنا ؟
لينا طوله يا زعيم .
وكيفنكم من أحداث سوداننا المحزنه هذه .
نقول شنوا ؟
عين وضربت سوداننا اللي جوه وجداننا بنريدوا .
و إذا جاز محور سوعالك ( سؤالك ) عنا .
فنحن اليوم الحمد لله ،
لم ينقصنا شئ سواء مشاهدتكم الغاليه المرضيه .
وشوفت سوداننا المارد الجبار قايم سوت كيه ، و واقف قنا بفضل الله ودعوات اولياءنا الصالحين ، وبسالة جيشنا جيش الهنا .
الا اللي جات من السماء بتقبل بيها الأرض .
فإذا وصلك جوابي ده بلغ سلامي لناس حارتنا وحدتنا حلتنا والجيران جت من دون فرز .
وقول ليهم ولدكم أيوب أبكر محمد أحمد الحويطات غرقان في محبتكم جملوغ كيه .
وقالدهم زيين.
ورجهم زيين.
وسلم ليهم سلام حآآآر .
وقُل ليهم سوا لينا بليله كرامه ( آنا جادي والله في كرامة البليله دي ) ربنا يرفع البلاء والغلاء والحرابه والكآبه والحزن والموت اللي بالجملة .
ليه كرامه بليله ؟
اقول ليك ليه ؟
لانوا أهل حارتنا وحدتنا فيهم الصلاح وحلال اللقمه والبساطه والاريحيه لان جُلهم اشعث اغبر كادح وحامد وشاكر .
وككيف ربنا ما بيجبب دعواهم ؟
ناس غُبش .
وبيوتهم غُبش .
وبحبوا الله شدّيد .
والله زاتوا بحبهم .
الله ماعايز وساطه .
آآآي والله .
والفُقرا هننا المجغننين في جوامع وزوايا حارتنا وحدتنا قول ليهم اللي يقرأوا لينا القرانيين ( القرأن ) .
كما جمعها جمع تكسير شهير بحارتنا وحدتنا ابونا الزعيم الانصاري عم حركه حين لمة مأتم عزاء بحارتنا وحدتنا .
ويقرأوا لينا سورة يس .
ويعملوا لينا عزيمه وتفاف ( تُف تُف ) فى الكور بتاعت الطلس .
بس من غير ( طلسهم دآآآك )
وأومبتارا هننا المنجكين ،
وبيمضغوا في اللحم .
وبتشهوا ديك لونزا بنفسجي .
وخروف لونوا حرجلي .
وبيغضوا في النيئ .
قل ليهم غضاضين النيئ شقاقين الكبده بالفأس .
أرقدوا لينا بالخيره .
وسوا النجيضه .
وسوا لينا الجوهرة الكبرى والصغرى .
وأم الصبيان .
لكن من غيرصنجينجات !!
عيال أم عيسى ( الفُقرا )
بطلوا الطلس .
وكن حيين بنتشاوفوا.
شبال وباص موزه ( اسكروا باص ) :
إنت سألت مين يوثق لايوب ابكر محمد أحمد؟
وانا اقول ليكا :
ياخ روح أُماتنا وأبهاتنا ( آباءنا وامهاتنا ) المؤسسين لحارتنا وحدتنا اللي هاده فينا دي .
دي براها توثيق .
لكنها توثيق ملح ( نحل ) .
ساقه الله لنا .
والملح الكتير بيجبب الضغط .
ولو كترنا من الملح بيرفع الضغط شدّيد !!!
بس نقول شنوا ؟
الله جعلا .
فانا بمحبة أهل حارتنا وحدتنا عرفت نفسى .
وبحبهم عرفني الناس .
وبحبهم جاني التوثيق ملح سااااكت كده .
حظوا طيب والله أداه .
ميته جانني ساااااكت كده !!!
نحمدك يا الله.
نوراني سيد شباب قادة حارتنا وحدتنا .
آية الله نوراني .
عارفك راح تطرشقك من القرقراب .
محبتنا وتقديرنا واحترامنا الذي تعرف يا وريف .
وبتن بقول ليك :
وبلسان اهلنا الجميلين النوبه الغلفان :
( نريت جيكني شوووراه ، جور كآآآلوا . آإإإي .
كينغ قآآآه ، شلمي لناس حلتنا .إإإإي )
*************************
وكن حيين بنتشاوفوا .
✍أيوب الحويطات.
************************
الصورة للنقابي والقيادي رمانة ميزان شباب حارتنا وحدتنا الزعيم النوراني محمد عبدالرحمن.
ليست هناك تعليقات:
إرسال تعليق