شق الصف

 شق الصف: مددي الخاص في الفضاء العام

(١)

قبل عشرين سنة وزيادة، وكنت في أواخر الحمل والدكتور قال لي الفي بطنك ولد، وكنا في مصر وكذلك الحبيب.. بتذكر مشيت قلت ليه انا عايزاك تسمي الولد محمد أحمد بدون ما الواثق يعرف، عشان قال ما عايز يسمي على زول وانا رأيي يسمي على ابوه وكمان محمداحمد اسم الامام المؤسس والمجاهد، ابوي قال لي بالحيل.. ثم وقت وضعته في قاهرة المعز ابوي قال سموه محمداحمد او اسحق.. أدانا أوبشنز من لطفه العميق وظرفه اللا نهائي وقال هو قاصد وأيضاً اسحق اسم ضحاك؛ نحن اخترنا محمدأحمد كما هو معلوم لكن أبوي كأنما تنبأ للولد دة في الزمن داك ثم حين كبر شوية وقبل ما يمشي ابوي قال لي الود دة دمه خفيف❤️

الحقيقة مدد دمه شربات وعندو انسانيات بديعة ولمن يلبس الردا عندو سكاكات الواثق قال جبدوه خيلانه😡

وعيونه جميلة.

(٢)

بعدين مدد نجيض وحسّاب وبجيب الرايحة حاجة في الدم كدة ..مرة كان في بازار لعدد من المعروضات في واحد من بيوت الاهل، ومن الضمن كان في عدة، أها سقته معاي وهو صغير سبعة تمنية سنين كدة قام شاف ثيرموس شاي سأل دة بي كم لمن قالوا ليه السعر طوالي قال ليه اصلو شنو خالتي اميرة هباني ماتت بالضحك من المفاصلة دي سألته انت ود منو قال ليها ولد زينب قالت ليه ايوااا والله صحي ود تجار ..

مرة برضو نسينا قروش في عربية مؤجرة في بلداً طيرو عجمي وقنعنا منها مرة واحدة مشى مع صلاح بقيادتو طبعاً ولقوا القروش جابوها .. كيف الله اعلم 

ويوم الموكب الاخير (١٩ ديسمبر) تلفوني اتسرق مني في ش القصر في نص البمبان والدموع والمخاخيت - لا مؤاخذة- جابو لي تاني يوم من الفتيحاب وهو والمعاهو دقوا الحرامي دق العيش وجابو معاه تلفون تاني سامسونغ لي يوم الليلة ما لامين في سيدو/ ستو🙄 .. وهكذا؛ احسن من تديه ضهرك وتوكله امرك❤️

(٣)

عادي الناس تقول شكّار روحو ابليس ، او شكّارتا دلّاكتا امها وخالتا داك .. لكن والله مدد ود البنات البلدن، ولد شديع ما بخوفوه بي أخ .. لي اليوم الفينا دة العسس الملاعين داقنو تلات مرات وساجننو لكن هو ولد ضرس حتى حكاوي ما بحكي الحاجات دي زي معظم ولاد الجيل دة الأكثر بسالة على الأرض وأكثرهم صمتاً في الوسائط .. لكن انا ياهو والله البجي اتبوبر واظهر والبس اصفر بهذه الأمور، الله يهدينا من المظاهر حي العرب😂🙊 

وبعدداك كريم اول ماهية ادوها ليه من وظيفة مؤقتة لأنو لسة ما اتخرج من الجامعة، عزمنا في مطعم خمسة نجوم يعلم الله ❤️ 

أنا كان مناي أبوي يشوف نجاحاتو هو واخواتو واخوانو ويعقد ليهم ويجرتقهم .. الكنت ح اشوفو في عيونو دة كان سعادة الدنيا بالنسبة لي، لمن ابوي عملوا ليه التنبيب وهو في الامارات انا خفت جيت كلمت مدد، مرّت في وشه سحابة قاتمة لكن قال لي ابوي الصادق الحبة ما بتجيه💔 

الله يعمر دارك يابا ويحقق نيتك فيهم جميعاً سماية ورعاية ووصايا ويسعدك في دار الخلود، طيفك ولا بفارقنا لحظة🤍❤️