🛑من ظرفاء أمدرمان
♦️الراحل /موسى ود نفاش
✍️عصام محجوب
طلال فيصل
♦️ موسي ناصر عبد الكريم الشهير ب (موسي ود نفاش) وهو ظريف الظرفاء احبه الناس في امدرمان وكل السودان ولد وترعرع بحي ودنوباوي شارع الدومه عرف موسي ود نفاش بخفة الدم وسرعة البديهة وجمال النكتة
😂بحكم مجاورته للسيد عبد الرحمن المهدي بودنوباوي كان كثير الحضور لسرايته هاشاً باشاً ومحملاً بالعطايا والهدايا وفي إحدى المرات ما إن تخطى السيد عبدالرحمن البوابة بسيارة الرولز رويس حتى كان ودنفاش يقف عاري الصدر باسطاً يديه وعندما ترجل العم باب الله(كان سكرتير الامام والمسئول المالي .. فسأله عم باب الله مستفسراً قال ودنفاش : سمعت قالو سيدي إتبرع بخمسمية جنيه للصليب الأحمر اها الصليب الأسود ده عاوز ليه 5 جنيه".
😂في احدي الاعوام وام درمان كان فيها جفاف شديد والخريف تأخر واقيمت صلاة استسقاء في ميادين الليق شمال معهد ام درمان العلمي وام الناس للصلاة الشيخ الورع طيب الذكر/عوض عمر الامام .. فصلي ودعا حتي البكاء في نفس الليلة هطلت امطار غزيرة جدا واستمرت لساعات كل بيوت الجالوص تأثرت
😂ويقال ان ناس امبدة اتوا غاضبين بعكاكيزهم لمنزل الشيخ عوض عمر مهددين ومحذرين من تكرار الصلاة .. بعد ايام موسي ودنفاش لقي مولانا عوض عمر قال ليه «يا مولانا نحن زارعين فاصوليا تدعو حتي البكاء !!! ما كان تخليها رشة خفيفة بدل طمبجتها كدا بعدين كان تدخل في الدعاء بتاعك ربنا يديك بدلحمارتك دي (عربية هنتر) فضحك مولانا عوض عمر.
😂كل ام درمان كانت تحب و ترحب بود نفاش في حوادث الانصار مع حكومة نميري بودنوباوي 1970 و القتل و الرصاص .. تاخر ود نفاش بدات النساء في العويل والبكاء و صار المنزل في حالة مأتم و في المساء حضر ود نفاش و لم يكن داريا بالحاصل فلقد كان في حالة (مقيل) مع بعض الاصحاب في ابوروف . فزجر النسوه و طلب منهم ان يكفوا عن البكاء
😂فقالوا ( هي ما كنا قايلين قتلوك في الحرابه ) !!! فقال لهم ( يكتلوني في حرابه ليه انا اصلو ود النجومي !!
😂قديما في ام درمان كان من يتبول او يتبرز في الطريق يؤخذ الي التمنه او الظبطيه و يغرم ريال و تلك كانت سياسة المفتش الانجليزي مستر برمبل بك .. واستمر هذا النظام حتي بعد خروج الانجليز .. بينما ود نفاش يتبول احس بشخص خلفه .. نظر فرأي الشرطي يقف خلفه فانتقل بضعة امتار و واصل تبوله وعندما طلب منه الشرطي ان يتبعه الي المركز قا ل ود نفاش امام الناس الذين تجمعوا ( انا بلته لاني شفته البوليس قاعد يبول ، اهو ده بولو اهو ) ، و عندما انكر البوليس قال ود نفاش ( اها يا جماعه في زول ببول في حتتين )؟ ؟؟ فاسقطت التهمة في يد البوليس و ترك ود نفاش في حاله
😂ومن طرائفه ونوادره ان اصحاب مصنع الشيري اتفقوا مع ود نفاش ان يضعوا صورته في قزازة الشيري بحكم انه شخصيه عامه ومحبوبه للجميع واتفقوا عاي تسمية هذا النوع من الشيري ب ( شيري ابو النفش) ووقع موسي علي العقد ، وسمع احد اقرباؤه بهذا الامر وذهب الي السيد عبدالرحمن وأخبره بالقصه ،، السيد عبدالرحمن ارسل في طلب موسي...
😂ياموسي بلغني انك عايز تخت صورتك في قزازة الخمره.
ودنفاش: لا حولااا ي سيدي شوف الخواجات الكفار ، الزول ما قال لي قزازة خمره ، انا قايلا حاجه تانيه.
😂... حاجه تانيه شنو ي موسي.
😂والله ي سيدي انا ماعارف غايتو لكن انت هدا خاتي صورتك في قزازة الريحه ، والسيد علي خاتي صورتو برضو في قزازة الريحه ، بس موسي ده حيطتكم القصيره ،، فضحك السيد عبدالرحمن وابرم معه اتفاقاً واعطاه نفس المبلغ الذي اعطاه له الخواجه ويزيد علي ان يرجع موسي للخواجه نقوده ولكن موسي بطبيعة الحال لم يفعل ، وادعي للخواجه بان السيد عبدالرحمن منعه من وضع الصوره ، وانتا زاتك ي خواجه ما عارفني انا انصاري كيف يعني اخت صورتي في قزازة الخمره!!!😂😂😂
😂يحكي ان والدة موسي جرته للسيد عبدالرحمن عندما كان صغيرا لكي يعطيه الفاتحه لكي يوقف جنه و شيطنته . وعندما ذكرت الوالده انه يدخن السيجاره الخضراء صفعه السيد عبدالرحمن و اطار سنه فطلب من العم باب الله ان يعطيه خمس جنيهات . و عندما قبض موسي الخمس جنيهات ادار وجهه قائلا ( واحده تانيه بي جاي يا سيدي ) . فضحك السيد عبدالرحمن بشده و قال ( الله ينعلك يا مطموس )😂😂😂
♦️ود نفاش وصل صيته لكثير من بقاع السودان حتي ظنوا ان الشخصيه اسطوريه او خياليه. من الاشياء المهمه جداً ولا يعرفها كثير من الناس عنه ، انه كان في كل يوم جمعه يشتري عدداً كبيراً من المكانس (المقاشيش) ويركب البسكليت ويطوف علي عدد من المساجد يقوم بتنظيفها بنفسه لصلاة الجمعه ويذهب تاركاً هذه المكانس في المساجد ، والجمعه القادمه يكرر نفس الشئ. هذه هذه القصه حكاها الشيخ محمد ود الشيخ دفع الله الغرقان رحمه الله ( مسيده بحي البوسته امدرمان)
♦️ ربنا يرحمه ويغفر له يتجاوز عن سيئاته ويتقبله قبول حسن ان شاء الله
ليست هناك تعليقات:
إرسال تعليق