زعلان منك أيّي لأنك
ما هببت قوافل شوقو
ولا أكرمت رسايلو الجنك
لا عوافي ولا كيفنك
يجري يلاحق في السُفار
العايدين والجايين منك
قبال ياخد خبر البندر
شوقو يسبقو و ينشد عنك
يلقى حنينو إندردر ساكت
تاري البندر وَدر حِـنك
تاريك ناسي في ماسي الغربة
حال الناس اليـوت طارنك
طاري عيونك لما تستف
تمسح دمعة التانية تقطر
نزف وداعك لما شعاعك
ساب الحلي ضلامه معكر
فدْ جواب طمني عليك
صهين تاني أقول مشغول
أبحت ليك العذر براي
وأبعت ليك الشوق علي طول
فكر أكنك في الطوالي
عبى رسايل فوقه رسايل
يا متجاهل كل الجنـك
لو كان قايل صدرو الماهل
مو بالساهل يزعل منك
ضايقو صدرو وبي طول صبرو
وماك حجر من إيدو يفنك
إنت بشر بي كل ظروفك
حر في جودك و حر في ضنك
ما بتربع يرجى حروفك
ولا يشابي علي غيم دنـك
ما بِضرَّع شان ما يشوفك
عندو كرامة تبدل حِنك
حميد
ليست هناك تعليقات:
إرسال تعليق