راح النهار ..
وانا في رجاك
غربه وهواجس وانتظار
ماجابك الشوق بالدرب
ولا جاني طيفك اعتذار
ماكان تخلي الريد
يعلم صبري فيك الانكسار
او ينهزم لحظه غيابك
بالمخاوف والهلاويس الكتار
ياغاليه ماعارفه الصبر
كيفن بعذب وجمرو حار
لى زول بشوف اللقيا جنه
وواقعو نار
يمسح دموعو على عشم
يوم بكره ماتنزل غزار
***
اشتقته ليك
والشوق تعب وفتر معاي
فاقدك كتير
والوحشه ملت من عذاباتي وشقاي
ياغاليه طال الانتظار
وكمل ورا الاشواق غناي
واتبعثرت كلماتي ليك
اهه وشجن مزمار وناي
وانا منتظر
قدامي بادي عشم كبير
وهداك عذاب الريد وراي
علي همشري
ليست هناك تعليقات:
إرسال تعليق