عيونك إذا في العيون ارتحال
بلمن شتات البلود الرحيبة
دروبك كتيرة ووصولك محال
درب فرحتك وينو كيفن أجيبا
و انا الدون زوادتك شددت الرحال
رسمتك حدود لي مدائن غريبة
بحب في قساوتك كلام لسه طيِّب
بشابه عتاب المحب للحبيِّب
ويجبر خواطرا كتيرة ويطيب
كما النيل جراح الجروف الخصيبة
ورغم إنو ضاميني ليك انتماي
ويشهد علي ربي عالم الغيوب
بحس فيكي حن المحب المفارق
كما فارقت أرضي أرض الجنوب
وبرضك بقول بينا نيل ما بينضب
وريدتك تشبع جياع القلوب
تصدي وتجافي
وحتى الصدود فيك كاسياهو طيبة
منو الفي الشمال مابغنيك محنة
ومنو المابشم فيك نقاوة أهلنا
منو الما حلم بكرة يتلم شملنا
وانت السكنت احتمالات صورنا
وغنانا
ولحننا
وقصصنا وأديبا
بنبعد
ونقسى
وبتحلف صور في الخيال إلا تبقى
محنة دماي في عروقك بتنتح
تسميني منك واقول إنت أنقى
و اجيك لوني أسمر
و ألقاك أسمر
أناولك تمرنا وتناوليني منقا
تقول لي بحبك
أرد حبي أكبر
ومشتاق اضمك
وأشوف شوقك أكتر
وتعلن دموع اشتياقك نحيبا
بشوف بكرة أجمل إذا في عيونك
تراءت إليك أي ذكرى بتطمن
إذا في خيالك رسمت ابتسامة
بتخفف مرارة خلافنا وتهون
و اضوق في مسامك ملوحة القبايل
المن الطين تشكل صورنا وتلون
ودون شك عيونك برغم النهاية
بقت لي حجاوينا سمحة و حبيبة
وبرجع و اقول (عذرا إن قولي طال)
تعالي النمد بينا سكة وصال
عيونك إذا في العيون ارتحال
بلمن شتات البلود الرحيبة
وئام كمال الدين
ليست هناك تعليقات:
إرسال تعليق