روائع الشعر السوداني

 مقاطع

وينك ..فقدتك...مسجل غياب؟؟!!!

وسايب قلوبنا وراك للعذاب..

نسوق ذكرياتنا ونبارى الرهاب

نفتش طريقك برغم الضباب

ونسأل عليك البعاد والقراب 

متين ياحبيبنا...متين الإياب؟؟؟

***

(2)

يا زول خرافى ومختلف

ماقادر أكتب فيك حرف

انا ياخى كاتلنى الولف

وانا جد بحبك ومعترف

وداير اقول للما عرف

قصة هوانا من الألف

* ****

(3)

الريد جوه قلبى معجون بالأسى...

والزول البريدو من تبيت ..قِسا..

إتجاهل هوانا وللأحلام نسى...

نام صبح التمنى فى حضن المسا

****

(4)

انا ذاتى ما جاياك..

جابنى الدرب بالريد...جدد على ذكراك

شفتك صباح اليوم...فى حوش أخوى بهناك

نفس المكان الكان..انا فيهو بستناك

فى الحيطه ديك حرفين...ناحتنهم يوم داك

والصوره حتى الآن ..فى خاطر الإدراك

مع انى قلتا اكيد...يومين وحا انساك

لكن لقيت الشوق..جواى بيتحداك

وتلقانى رغم البين..يوماتى بتمناك

ساسقتا بين حوشين...كان مره بس القاك

واتجاهل الإحساس..واعملنى ما شايفاك

وكان قلتا جابك ايه ؟؟!...أنا ذاتى ما جاياك

****

(5)

الدنيا دار ما بتستحق..

بيبانا فاتحا غرب شرق..

كل زول دخل فيها ومرق...

جارى ويكابس فى الخلق..

وجبينو يتصبب عرق...

وما خلى ذكرى سوى ورق.

تلويح:

الشعر يكتبنا بماء الياسمين...

ويعمدنا بالوجد والحنين.

داليا الياس