تمشي لا أسفـاً عليك لا عفى الله تاني تنفع
تلقى يا سفاح جزاك و تلقى قبال بكرة هسع
يوم نقول للتار كفاك
يصرخ التار فينا لسع
اليضوق الضُقنا مِنو ياما مِنو الضُقنا أفظع
لا تجاملوا و لا تحنوا
خلوا بين طرشان و يسمع
يبقى للجايين وراهو عبرة لو العبرة تنفع
لا لجان شعبية تجدي
لا قرارات فالصو تنفع
لا في مؤتمرات بتجدي شعب مو جعان مجوع
لا دفاعاً شعبي يشفع
لا في دبابات بتمنع
لما كل الشعب يوعى لما كل الأمة تطلع
يوم تفوت النيل يفيض
المطر في الوادي يرشع
والجريح من جرحو يبرأ والعليل للعافي يجمع
يا دقن كضابة تسرق
فينا بسم الدين وتقلع
مرة بسم الجيش و دعمو مرة بالوطنية تنزع
يا مشـوِّم حظ بلدنا
شومك الجوانا أفظع
كيف بنلبس من ما نصنع وإنت في اللابسنوا تقلع
في حليب أطفالنا تطمع
كيف بناكل مما نزرع ، التمر بي شيلو وَقّع
مهما وَسّع في سجونك برضو عزم الشعب أوسع
حميد
ليست هناك تعليقات:
إرسال تعليق