الفي الدنيا ،،،،، كايس اخوان وداير إوالف
بلقي الأصلي في الاخوان ،، وبلقي التالف
واحد بطرو يوم ،،، ظرف المعيشه يخالف
واحدين ناس ضحك ساي وهظار وسوالف
ما كل البقصرو ،،،،،، في الحقوق فجار
ولا الجود والكرم محصور علي التجار
واحد بيتو فِله ،،،،،،،،،،، وما بعزم الجار
واحدين اكرمو الضيفان ،، وبيتن إجار
الجود والمكارم ،،،،، والتواضع رفققه
الخوف والبخل ،،،،، اولاد اعم الشفقه
مهما النيمه تشرب م بتجود ب صفقه
النخل العطش ،،،،، ما بردو من النفقه
الحر لا بقول ،،،،،، للجاية تسأل قدي
لا بقول ليها ابعدي يا سجم من ردي
البي العنوه فاتت ،،،، ما بجيبه الودي
الما بدي جيعان ،،،، كان شبع ما بدي
مواقف الدنيا مدرسه والليالي مواد
الحر بنعرف ،،،،،، يوم افرزو الاعواد
ارجي البدر يتحول ،،، بياضو سواد
لكن البخيل ،،، ما ترجي يبقى جواد
الجود ماهو قول نحنا وحديث وخطاب
الجود انو تعفي ،،،،،،،، الجابلك الاعطاب
طيبك سوو ،،، حتى مع المعاك ما طاب
الشجرة اابتدس ،،،، الضل من الحطاب
اقطع اصابع الكف ،البجيب م بودي
شان ماتبقي زي ،، المرمي والمتردي
صاح الخوة مي حلبة سباق وتحدي
لكن لما تاخد ،،،،،،،،، حاول انك تدي
ما تباري المقامك بسعى ف تفشيلو
ولا الزول البصدق فيك كلام واشيلو
البديك فضايلو ، و يابا فضلك اشيلو
لو الدنيا جت في جيبو ،،، ما تمشيلو
ليست هناك تعليقات:
إرسال تعليق