😍قصة أغنية في زمن الجمال😍
🌳 الشاعر المتفرد الراحل عوض جبريل (رحمه الله) عندما سأله أحد أصدقائه عن رائعته مع الفنان ترباس ( ما تهتمي للايام ) ..
قال لصاحبه ذلك :
نظمتها عندما إجتاحت السيول والأمطار 💦 السودان.. ومنها كذلك بيتنا في الثورة..والليل كلو لحدي الصباح زوجتي والاولاد ينشلوا في الموية من حوش البيت الغرقان للشارع الغرقان ذااتو..والبيت سقوفو تطقطق..ومرتي تقول لي يا عوض كم مره قلت ليك تصين البيت ده 😰
وفي النهاية البيت وقع واتهدا..قدام عيونا كلنا..وانا جاتني خاطرة الاغنية..وبديتا كمخاطبة لزوجتي ب(ما تهتمي) للايام..
ما تهتمى للايام ظروف بتعدى
طبيعة الدنيا زى الموج تجيب وتودى..
ما تهتمي للأيام
🌹🌹🌹
ما تهتمى اصلو الناس حياتا ظروف
بتتعود تغير كل خط مالوف
مصير الزول حياتو ياما فيها يشوف
وفى دنيانا بنلاقى الفرح والخوف…
ماتهتمي للأيام
🌹🌹🌹
مصير الزول عشان يفتح طريق يادوب
يكون زادو البشيلو معاهو شوق مشبوب
عشان يلقى انتصارو يا زمن محبوب
يضوق المرة. ويتوشح بصبر أيوب…
وما تهتمي للايام..
🌹🌹🌹
جمال الدنيا فى بسمة سرور وجمال
وفى فرح الخواطر الطيبة فى الآمال
وفى شروق الصباح فى بسمة الأطفال
ومهما تظلم الأيام ضياها الفال…
و ماتهتمي للأيام
🌹🌹🌹
أيضاً قال لي بعد سرده للأغنية صاحبك ترباس عمل فيني معروف كبير جدا لما كلفو سعادة الوزير عمر الحاج موسى(رحمه الله) بالغناء في سجن كوبر للترفيه عن المساجين..فلما غني ليهم ما تهتمي للايام..كل المساجين انفعلوا معاها وبكى منهم من بكى ورددوها مع ترباس..فسأل الوزير ترباس: دي كلمات منو..؟ فحكى ليهو انها كلماتي ووراهو ظروف الاغنية شنو ..
فقال ليهو بكره تجيبو لي في المكتب..
و فعلاً مشينا ليهو وقال لي دي اغنية عظيمة ومفروض تخاطب بيها كل الشعب السوداني عشان ظروف الناس كلها..ورجاءاً خاصاً اعملها
(ما تهتموا للايام) بدل (ما تهتمي) عشان الناس كلها تحس إنك بتخاطبا مش زوجتك بس ..
وطوالي سلمني تبرع من وزارة الشؤون الاجتماعية وبحمد لله كان كافي جدا يبني لي بيتي جديد بدل القديم الوقع ..☺
ربنا يفرجها عن جميع المتضررين من اهلنا النبلاء الشوامخ وان شاء الله ظروف بتعدي..🤲
(منقول)
ليست هناك تعليقات:
إرسال تعليق