اوجهة الشبه ما بين الحكومة الانتقالية والحكومة الكيزانيه

 *اوجهه الشبه ما بين الحكومه الانتقاليه .. والحكومة الكيزانيه!!* 

*بقلم : حسين محمد علي* 

* تقول الطرفه ان بلدياتنا (الدنقلاوي ) - ذهب الي الخرطوم مستشفيا من (صداع مزمن ) منعه النوم بالليل والكد بالنهار.. فقابل هناك في بلد (الرئيس ينوم والطياره تقوم) أمهر الاختصاصيين للتخلص من هذا الصداع المؤلم .. وبالفعل أعطاه الطبيب عدد من العقاقير الطبيه وحدد له اعاده المقابلة بعد يومين .. وبعد يومين أعاد بلدياتنا معاوده الطبيب فبادره بالتحية ثم قال له - اها - ان شاء الله الصداااع خفا ؟ - قاليهو والله ي دكتور لا زال الألم في حالو .. هنا تدخل الطبيب وقال له : سأقوم بتغيير بعض الأدوية ولكن قبل ذلك  حدثني هل تنام في غرفه شبابابيكها مغلقه ام مفتوحه ؟ قاليهو شابابيكها مغلقه - قال الطبيب .. مع استخدام هذه الادويه لابد أن تفتح النوافذ حتي يتجدد الهواء ويساعد علي تخفيف حده الصداع مع هذه العقاقير.. فرح بلدياتنا وتوكل نحو الدار وفي المساء تناول الأقراص الطبيه ثم عمد الي الشبابيك وعمل بنصيحة الدكتور ثم زاد المويه حبتين ففتح باب الغرفه أيضا ودخل في نوم عميق .. وفي اليوم الموعود للمقابله الثانيه .. خاطبه الطبيب قائلا (اها - ياحاج محمد صالح ان شاء الله الصداع رااااح؟) - تمعر وجهه الحاج محمد صالح وهو يقول ( ي دكتور - هو الصداع براهو راااح - التلفزيون راااح والتلاجه راااح والملايات راااح والتلفون راااح .. وأضاف قائلا ي دكتور معقوله نجي بلدكم دي للعلاج الحرامي يعدمنا حق الملاااااح ؟؟) - فضحك الطبيب وهو يقول له دي ضريبه المدينه ي عم محمد صالح.. انتهت الطرفه.

* تذكرت هذه الطرفه بعد حديث الساده (المسعولين) في حكومه الفتره الانتقاليه في مؤتمرهم الصحفي يوم أمس والمتعلق ببداية العام الدراسي وطباعة الكتاب المدرسي ومجانيه التعليم الحكومي.

* والشاهد في الموضوع أن صدااع مجانيه التعليم الذي (قدا) بيهو (القراي ) راسنا ما براهو (الرااااح) (فالكتاب المدرسي الجديد راااح.. والكتاب المدرسي القديم راااح .. بل العام الدرسي الجديد في نفسو زاتو راااح).

* عاد دا اسمو كلام ي (القراي).

* انتو قعد تبنو التصريحات المهببه دي علي اي أساس .. والله ما عارف لكن أنا حاسي كده انو الكرسي الوزاري دا لمن المسعول يقعد فييهو تجيهو أفكار خياليه للحد البعيد غير متطابقة للواقع الذي يعيشه المواطن العادي.

*لانو اعضاء الحكومه السابقين برضو كانوا بيصرحوا ذي التصريحات دي من شاكله (سنردم البحر ونشيد الكبري ونشق الترع ونزرع الصيفي وناكل مما نزرع ونلبس مما نصنع .. ولامن مشو رقبه المصانع الكان شغاله وقفت.

* القراي قال بعتزر عن تصريحاتي السابقه بمجانيه التعليم الحكومي ومجانيه الكتاب المدرسي.. اعتزارك ما بيفيدك ي (القراري ) - ابقا قدر المسؤليه وقدم استقالتك واتخارج بالباب الخلفي بلا مسخره معاكم.

* والله انتو فعلا (حكومه الاعتزارات العجيبة !!).. عمركم شفتو ليكم اعتزار طبع ليهو كتاب ولا نجح ليهو طلاب ؟

* مدني يوعد بحل مشكله الخبز نهائيا ويفشل ويعتزر.. وحميدتي يوعد (برمي الضولار أرضا ) ويفشل ويعتزر.. وحمدوك يعد الثوار بقصور الشام وعنب اليمن ويفشل ويعتزر ..ووزير الماليه يوعد الناس بثبات الدولار عند الستين جنيها بعد منح شركه (الفاخر )تصدير الذهب ويفشل وقبل أن بعتزر تتم اقالته من المنصب .. والدولار يصل (270) ولا ذال العرض مستمر .. وعييييك ي حكومه الاعتذارات العريضة .

* انتو لييه ما دايريين تعتذروا كمان عن مناصبكم دي طالما فشلتو في تحقيق أماني الثوار وأحلام الطلاب ومعالجه الاقتصاد؟

* وزيره الماليه قالت لا يمكننا تطبيق مجانيه التعليم إلا بعد عامين او ثلاثه أعوام .. ي سلام ي سلام ..وانتي ي حضره الوزيرة لسع حتقدي ثلاث سنوات كمان ؟..دا إذآ لقيتوا وطن (اسموا السودان ) ابقا تصريحك في محلو. 

* انتو بي حالتكم دي سنه تأتيه ما بتعدوها .. قالت ثلاث سنوات .

* الوزيره التي نجحت في مهام غير مهامها عندما تقدمت خطوتين وخالفت البرتوكول في مطار الخرطوم لالتقاط صوره تذكارية من رئيس الوزراء الأثيوبي تفشل في مهامها الرئيسيه وهي تأمين مبالغ طباعه الكتاب المدرسي من أجل بدايه العام الدراسي في موعده.

*فأوجهه الشبه تكاد تكون متقاربة ما بين (الحكومه الكيزانيه السابقه وما بين حكومه الفتره الانتقاليه الحاليه )- خاصه فيما يتعلق في إطلاق الشعارات البراقة والوعودات الرنانة والتصريحات الخداعه  والحلول العقيمة وحب الكراسي الوثيره والنوم في عسل السلطه المحفوف بالمخاطر وبناء آمال الطموحات  علي عيار الذخيره الفشنك إلي غير ذلك من الخطط الغير مدروسة .

* ي عالم ..منذ الاستغلال الشعب يتعب في تغيير حكومه سيئه للغاية تأتي حكومه أسوأ منها واضل سبيلا.

*(65) عاما منذ الاستغلال ولا ذلنا في المربع الأول مربع الفشل التنموي والتخلف الإداري .

* احترنا زاتو .. في تحديد (الازمه مكانا وين؟) - (في الضمير المعدوم ولا التخلف الموروث ولا في الإدارات الكسيحة ولا في السياسات العقيمة.

* بلد حدادي مدادي وفيهو انهار واراضي ما تنتج منه إلا غير الكوارث والمحن .

* كان الله في عونك ي شعب.