قصصات من ورق

• *من مفارقات الغربة :*
• * قصة حقيقية..*
• سوداني كان يعمل مستشار اقتصادي في شركة معتبرة في السعودية.. كان موفق في حياته الاغترابية..  واستطاع اكمال البيت في منطقة محترمة فيهو كم دور وعمل ليهو استثمارات اخري.. الوليدات كبروا.. ومشوا الجامعات في السودان.. وام العيال تجقلب بين العيال وابوهم.. الأولاد والبنات اتخرجوا.. والبعض تزوجوا وأنجبوا.. والعمارة الكبيرة اتقسمت بين الاولاد.. وازواج البنات.. والشفع ملوا العمارة.. والحبوبة مستمتعة بالاحفاد والاسباط.. وصاحبنا في دار الغربة لتكملة الناقصة وانتظار الاجل المحتوم.. المستشار استلم خطاب الاستغناء عن خدماته وقال الحمدلله.. كلم الجماعة.. وكانت ردود فعلهم عجيبة.. الولد الكبير ضابط الايقاع والمستفيد الاول من بعد الوالد  وبيده مفاتيح العربات ويعمل في شركة براتب متواضع لا يتعدى مصاريف الترفيه الاسبوعي ومصاريف الحلاقة والقصات والايس كريم.. وحق البنزين من الحاجة.. صرخ في التلفون في وجه الوالد وقال ليهو يا ابوي والله البلد زي الزفت وشوف ليك طريقة حول الكفالة.. والا اي شغلانة تانية..
• البنت الكبيرة قالت ليهو يا بابا انت عندك السكر والضغط و.. و.. البلد ما فيها علاج.. الحاجة التزمت الصمت وعندها بت واحدة في السنة النهائية في الجامعة.. المستشار شرب كلام الجماعة كلهم وقال ليهم انا جاي نهائي.. جاي نهائي ودا قرار نهائي.. الرجل وصل بيتو واصلا كان بيقعد فيهو 30 يوم فقط في السنة..
• المستشار راجل كلس.. بعد وصل البيت يعجبك.. بعد انتهت ايام الضيافة والمناسبات.. عمل اجتماع عام وطلب من الولد الكبير تسليم مفاتيح العربات للحاجة.. والناس تركب المواصلات زي كل الناس.. وبعد 3 شهور انا عاوز مفاتيح الشقق كلها.. البنات يكلمن رجالن.. الحاجة زعلت شوية.. المستشار أصر على رأيه.. والحاجة تبكي مقدما علي الوليدات الصغار المتعلقين فيها..
• المستشار قال ولا كلمة ولا تراجع عن هذا القرار.. بعد ال 3 شهور البيت بقا خلا.. دخل مقاول صان الشقق.. دهانات وسباكة وكهرباء.. وسماسرة العقارات يطلعوا وينزلو.. تم استئجار كل الشقق شئ بالدولار.. وشئ باليورو.. وشئ بالجنيه..  وبت الجامعة ذاتا قال ليها شوفي ليك داخلية وتعالي في الويك اند بس.. وبالمواصلات.. الجماعة يجيبوا وليداتهم الصغار يوم الجمعة بالمواصلات عشان يتغدوا مع الحجاج وبعد المغرب يتوكلوا..
• المستشار كل 3 شهور هو والحاجة في دولة.. شئ اهرامات شئ فاس.. شي الاسكندرية.. وصاحبنا رجع عشرين سنة لي ورا.. ومبسوووط.. من البيت للمسجد.. والمناسبات المختصرة.. والعربات ارتاحت من الاغاني الهابطة والسهر الفارغ..
• قصة حقيقية بطلها الان في السودان ومبسوووط ٢٤ قيراط..
• *(لكن.. ما عصرت عليهم يا مستشار)..*
• *منقول :*
• *من قروب الدراسات التجارية جامعة السودان للعلوم والتكنولوجيا..*