السفير عمر الشيخ

• #مالكم_كيف_تحكمون
• #نزار_عبدالقادر
• #السفير عمر الشيخ
• قبل كم يوم أصدر رئيس الوزراء د. عبدالله حمدوك قرار بتكوين الآلية الوطنية للتنسيق مع البعثة الأممية الجاية للسودان  UNITAMS وعين فيها السفير المتقاعد عمر الشيخ في وظيفة المنسق الوطني.
• س: لينا كم يوم بنسأل عن الزول ده هو منو؟
• ج: إسمو بالكامل عمر الشيخ محمد أحمد، من مواليد سنة 1940 يعني مولود قبل ولادة الأمم المتحدة، وهو من سكان أركويت بالخرطوم
• س: وتاني؟
• ج: السفير عمر الشيخ خريج كلية القانون جامعة الخرطوم سنة 1964م، يعني حضر أول ثورة شعبية سودانية ضد حكم الرئيس عبود، وبعد ما إتخرج إشتغل طوالي قاضي لمدة سنتين، وسنة 66 تم تعيينه في وزارة الخارجية ولمن جو ناس البشير طلعوهو للصالح العام ومعاهو الوزيرة أسماء.
• س: وين المحطات الإشتغل فيها؟
• ج: من سنة 66 لي 68 إشتغل في رئاسة وزارة الخارجية ، ومن سنة 68 لي 73 إشتغل في البعثة الدائمة للسودان لدى الأمم المتحدة، ومن 73 لي 75 رجع تاني للخارجية (الإدارة القانونية) وبعدها إشتغل في سفارة السودان في بيروت لمدة سنة، وسنة 77 بقى لأول مرة سفير ومشى طوالي نائب سفير في سفارتنا في لندن وقضي فيها ثلاثة سنين.
• من سنة 1980 ولحدي 1985 كان مدير لإدارة المنظمات الدولية بالوزارة، وآخر منصب إستلموا كان في نيروبي كينيا سفير للسودان ومندوب دائم في منظمة الأمم المتحدة للبيئة UNEP و مركز الأمم المتحدة للمستوطنات البشرية (HABITAT)
• س: أها وبعد ما جو ناس الإنقاذ ديل عمل شنو؟
• ج: بعد ما فصلوهو ناس الإنقاذ ما رجع للسودان إشتغل مع ناس منظمة الأمم المتحدة للبيئة في نيروبي ونيويورك لحدي سنة 1993م
• س: هل إشتغل قبل كده في بعثة للأمم المتحدة؟
• ج: نعم، بعد منظمة الأمم المتحدة للبيئة إشتغل في بعثة الأمم المتحدة للإستفتاء في الصحراء الغربية  MINURSO من سنة 1994 وحتى 2004م وأتذكر كان مساعد لي جيمس بيكر وزير الخارجية الأمريكي الأسبق  عندما تولى منصب ممثل للأمين العام للأمم المتحدة في موضوع  الإستفتاء في الصحراء الغربية  ونائبا لرئيس اللجنة المكلفة بتحديد أهلية الناخبين.
• س: وعلاقتو شنو بإتفاقية السلام الشامل بتاعت جنوب السودان؟
• ج: سنة 2005م وبعد ما رجع للسودان إشتغل كمنسق ما بين الأمم المتحدة وحكومة الوحدة الوطنية التم تشكيلها بعد توقيع إتفاقية السلام الشامل وحكومة جنوب السودان.
• س: يعني عندو خبرة قديمة في مجال التنسيق ده؟
• ج: أيوة
• س: وشنو قصتو مع بروفيسور محمد ابراهيم خليل لمن كان ماسك رئيس لمفوضية الاستفتاء بتاع الجنوب؟
• ج: السفير عمر الشيخ تلميذ من تلاميذ البروف في كلية القانون جامعة الخرطوم، ولمن كان البروف بفتش ليهو على أمين عام لمفوضية الاستفتاء ، ما وجد أفضل من السفير عمر الشيخ عشان يعينه في المنصب ده، وعشان خبرته الطويلة مع بعثة MINURSO طلبوا منو الشريكين الأساسيين في اتفاقية السلام الشامل ، أنو يعمل ليهم مسودة اتفاق بشأن الكيفية التي يمكن بها للأمم المتحدة أن تساعد في عملية انجاح الاستفتاء في جنوب السودان، عمل المسودة ولكنه إعتذر عن منصب الأمين العام لمفوضية الاستفتاء.
• س: معلومات شافية وكافية يا نزار، طيب شنو الفرق بين اللجنة الأولى بتاعت جابر للتعامل مع الأمم المتحدة واللجنة التانية بتاعت عمر الشيخ؟
• ج: الأولى كونها البرهان والتانية حمدوك، ألأولى  إسمها: اللجنة الوطنية العليا للتعامل مع بعثة الأمم  المتحدة، والتانية إسمها الآلية الوطنية للتنسيق مع البعثة الأممية، الأولى رئيسها فريق في الجيش والتانية برئاسة سفير متقاعد، الأولى ممنوعة من التعاون مع البعثة الاممية في قضايا حقوق الإنسان والمحكمة الجنائية الدولية، والتانية حتتعامل مع البعثة حسب خطاب حمدوك للأمم المتحدة في فبراير 2020م وقرار مجلس الأمن الأخير 2524. الأولى غير قرار تعيين الرئيس والمقرر ما سمعنا بإسم زول تاني، أما التانية فإطلعنا كلنا على صورة من قرار حمدوك وأسماء أعضاء اللجنة ومهامها
• س: هل حيحصل تضارب بين اللجنتين؟
• ج: بالتأكيد
• س: والحل
• ج: الحل انو الرئيس البرهان يلغي قراره  
• س: أصحاب وتلاميذ السفير عمر الشيخ بقولوا عنو شنو؟
• ج: بقولوا إختيار موفق من حمدوك، قانونى ممتاز، منحدر من نسلٍ دبلوماسيٍّ عريق، ملم بشغل بعثات الأمم المتحدة، والمنظمات الدولية والجمعية العامة للامم المتحدة. 
• س: وتاني بقولوا عنو شنو؟
• ج: قادر على قيادة سفينة الآلية الوطنية للتنسيق مع البعثة الأممية بنزاهة وشفافية وبمهنية وبصيرة سياسية.