لمسة حزن

• مقال لزول ممغوس مغسة شديدة
• (١)
•  (لمسة حزن )
• الشعب السوداني كله عندو قابلية انو يسرق وانو يرتشي وانو يخادع وانو يداهن ويتملق عشان يصل للحاجة اللي بتوافق مصلحتو الشخصية ودوافعو الذاتية  ..المشكلة أبدا" مافي الحكومة...ايوه صح ممكن الحكومة تكون مقصرة وممكن تكون أخفقت..  بس انحنا عندنا أزمة ضمير...سيد اللبن بيبيع الرطل ب 70 وبيديهو جك مويه...صاحب الفرن العيشة بي جنيهين وبعد ده بيتلاعب في الوزن حقها ويبيع كوتة الشوالات...سيد الامجاد بيمشي الطلمبة يكب وقود مدعوم وما بيدخل الصف في موقف الركاب بيمشي يحلب الوقود الكباهو وببيع الجالون ب ألف ج وتلقاهو مولع سجارتو قدام ست شاي يخوت ليها 50 ج عن كباية جبنة وفي قمة انبساطو انو قدر يغش ويوفر قروش من غير تعب...محتاجين لإعادة صياغة...محتاجين انو نستشعر ونحس انو أنحنا قاعدين نهدم في وطن ببيع ضمايرنا..  قاعدين نمحو في ملامح وطنا..أي زول فينا بينعل الحكومة وبينعل الظروف وبنشتكي من غلاء الأسعار...بلد حدادي مدادي البيضة الواحدة حصلت 18ج. شيعنا الإنسانية  في البيع ، أغنى بلد بالثروة الحيوانية كيلو اللحمة حصل فيو 700ج...الموضوع مامحتاج لي حكومة الموضوع محتاج للعودة لله ولجادة الطريق..  الفيهو انحنا ده بلاء من رب العالمين وغضب إلهي أنو الشعب يبيد نفسو بي نفسو...شيوخ وأئمة مساجد بيطلعو في المنبر ويلعلعوا وياريتم بنذروا تجار سلع البطون والجياع بتذكيرهم بالخوف ووعيد رب العالمين وتلقى الواحد  فيهم عندو دكان ، السلع كلها مضارب في أسعارا ومغشوشة كل 5 دقائق سعر زايد...أي مؤسسة حكومية كلها سرقات ومحسوبية وعدم مخافة من الله..  إستغلال بصورة بغيضة للمنصب وفي كل مناحي الحياة والوظيفة العامة..  الكمامة قبل الكورونا بتنباع بي 25ج...بدل ما سعرها ينقص وتتوفر لا بيحصل فيها ندرة والحبة الواحدة بتحصل 500ج....وشوفو حجم الانتشار والأعزاء الفقدناهم في 4 أشهر
• الادوية المنقذة لملايين الناس اللي عندهم امراض مستديمة بس الصيادلة مايسمعوا انو الادوية دي فيها ندرة يقوم واحد جبان تاجر وليس صيدلي يشتريها من كل الصيدليات ويحتكرها في بيته وبعد شوية عينك ماتشوف الا النور في فلكية الأسعار ...درب البنادول هو الوحيد اللي بيتم صرفه لمريض الكنكشة بس المرض يظهر بي جاي الدرب ينعدم وسعرو يصل لي600ج الحكومة تعمل شنو يعني؟ لو الحكومة كانت بتتعامل بي حسم وبتقدم تجار الموت ديل للمشانق ، البلد كانت مشت كويس..  انحنا شعب محتاج زي الرئيس الكوري الجنوبي..عشان انت لو صاحب فرن ونقصت وزن العيشة يعدمك بي دانة حقت آر بي جي وبعد إعدامك يعلقكوك في شجرة زغوم لتبقى عظه وعبرة للعفن الزيك....كلنا دايرين مستشفيات نضيفة واسواق مخفضة وطلمبات وقود فاضية ونحن بنحتكر البنزين وبنخزنو في بيوتنا..  وبنرمي سفة التمباك في سراميك المستشفى وبنرمي عقب السجارة وهي لسة مولعة جمب تنوكة البنزين وبنكتب تذكار بالفحم في سور الجامع..كلنا جهلة ملاعين وماعندنا بذرة خير جوانا...بنسور بالطوب قدام بيوتنا حقارة في ناس الأراضي والمحلية والجار الملاصق ، بنكنس قدام البيت والوساخة بنرميها في النمرة الفاضية عشان المغترب الماعندو سيد يجي داير يبني بيتو يلقاهو مكب نفايات... انتو قايلين انحنا ناس؟؟ياخي كمية تخلف وجهل وانانية وحب ذات فايت الحد...حتى لما تحاول تتبرع وتحاول تصلح السلوك العام يشوفوك متفلهم وفاكيها في نفسك...يشوفوك كائن فضائي جيت عشان تمرض الناس اللي هي اساسا" افهم منك وأوعى منك وبتعرف في السياسة والفلك وفي الطب وفي الإقتصاد وفي الذرة... شعب بيسرق الكهرباء من العامود وبيحلب الجاز من عربية الحكومة الشغال فيها مجرد سواق وبيبدل اللستك حقها بي لستك قديم عشان يمشي يبيعو في السوق ويطلع ليهو بي سجم قروش حرام يأكلو أولادو! ....منتظرين من الشعب ده شنو؟ شعب سيد المطعم في حوض الغسيل بيخرم الصابونة ويديها حبل عشان مايجازفا حرامي ويمشي بيها.. يجيك واحد يقول ليك ده شعب مبدع....لالا مابدع...ده شعب حرامي وعلي بابا كمان...صابونة يقدوها ويربطوها بتسميهو ابداع؟ ياخي مفروض نبكي على حالنا...لانو ده وضع تااااااااافه وجبان....
• شعب لايوق بيمسك في محاسن. كبي شاي سنتين مايفكها.ويغدق عليها بأموال الحرام ولياليها..واول ماتطلع نركب الكركابه ينسى ليك حنان محاسن زاتو ويقعد يلوك في شجر النبق اجق اجق اجق...
• وبعد ده السودان جميل...جميل بالارث الطيب الزرعوهو أبهاتنا واجدادنا...اي دولة بتستشرف الحاضر والمستقبل....الا انحنا ماضينا اجمل من حاضرنا...واجمل من مستقبلنا....
• والله الناس تحاسب خيبات نفسها...الناس تحاول تلم شعث البلد دي...ما أي زول يقول يانفسي...ما اي زول يقول وانا مالي...ما اي زول يقول السبب من الحكومة  الحكومة دي منو؟ ماياها انا ولا انت..الحكومة دي هي عمك ولا ود خالتك ولا اخوك.. ولا أختك
• إن ترقية السلوك بتبدأ منك ومن المحيط اللي حولك...تبدأ من بيتك ومن جارك ومن الحي اللي انت فيهو...يعني الليلة  لو في حلتكم في تاجر بنقو ومعروف البنقو اضرارو شنو ع اللي حولك اخوك وولد جارك ود خالتك.  ..ممكن البنقو ده يضيع الاولاد ديل...وده شر مابعدو شر...ساي لو مشيت ويلغت عنو يقولو مع الإعتذار للكلمة مشى (اتعرص) فيهو وقبضوهو! !!! معناها يا اكون انا (معرص)..  يا اقفل خشمي واخلي السم الهاري ده يخش أي بيت ويفتك بعقول الشباب ويوردهم موارد الهلاك والتهلكة صح؟ أو جيران لبعض عارفين شاب أو مجموعة شباب اغتصبوا بت فلان الفلاني ، لاءا نسوانوم يحلفن ما يتفتح بلاغ عشان نفسياتوم وبتهم ووصمة المجتمع والذئب والذئاب حايمين بمرضهم وسط إناث الحملان!!؟؟؟؟
• يخوانا....انحنا والله البنساعد في تفشي الشر...انحنا البندي الشيطان فرصة انو يصاحبنا ويدخل بيوتنا ويآكل معانا...عادي بتلقى في الحلة بيت بيعمل عرقي وعااااااادي انحنا متسترين عليهو...البيت القاعد يعمل زي العمل الردي ده ، ماقاعد يقدم لينا محاضرات احمد ديدات...ده يا جماعة بيقدم لينا ام الكبائر....تبلغ عنو انت (معرص)....تسكت ياكا الزول الشهم الما بخون الجيره مش؟ ساكت عن حق وشيطان أخرس والأئمة يطبقو في وريقة الخطبة وهم عالمون بالويل والثبور وفظائع الأمور ، يا الله: باطن الأرض خير لنا من ظاهرها
• ياخي انا غلبني الاقولو والله...
• بس بالجد انحنا محتاجين نحب البلد دي.  .نحبها بالفعل مش بالكلام...نحبها عشان لو متنا اولادنا البنحبهم يجو يلقوا فيها حاجة تتحب...مافي زول بيكره ولدو...ولا امو...ولا ابوهو...ولا اخوانو...طيب البلد دي ماياها امنا وابونا واولادنا واخوانا...زي ما انا داير ولدي افتخر بيهو كمان داير وطني يشرفني...داير وطني يقدر يستوعب طاقة بنياني ليهو عشان يبقا فووووق ليه العالم من حولنا ماشي قدام ونحن راجعين ورا؟ امسكو بس اثيوبيا القريبة دي. ..الحبش بيجو عندنا إغتراب...شغالين في البيوت وسوات الشاي ، رقاشه.غسالين. حرامية ياخي شغالين أي حاجة...وبيحولو لي بلدوم عملة.. وعندهم ضرايب وعندهم ضريبة قوميه....هم بي جاي وبلدم شغالة بي هناك تعمير وتنمية وسدود وبنية تحتية صح....تعالو الليلة اعملو مقارنة بين اثيوبيا وبين السودان؟ خليكم من ده تعالوا اعملو مقارنه بين اديس والخرطوم؟ شوفو الفرق...الفرق انو الحبش بيحبو بلدوم بالأفعال مابالكلام...انحنا ناس بنحب الكلام في الفارغة والمليانة....في مكاتب الشغل كلام ،في القهوة كلام في طرف الشارع كلام في ناصية الدكان كلام....حتى الدراما حقتنا ناس فضيل ماعطننا بالكلام.....تلقى الواحد قاعد بيضرب في صحن بوش يقول ليك ميسي امبارح كان كعب...ياراجل؟ ميسي راتبو الشهري 57 مليون يورو يبقى كعب ولا كويس راتبو براهو ميزانية السودان مالنا بيهو؟ طيب هو لو كعب معناها انت مفروض الكورونا تطلع زيتك....
• يخوانا......خلو النقة وحاولو حبو السودان..  
• 
  
• 
  
• د. صلاح البلولة