كعب الزول تريدو وليكا يضمر شرو
عينه زي دا لو لقاكا فرتق وخلو
لو بتريد حبيبك ريدك اوعي تورو
شأن المخلصين فوق الغرام بنزلو
الريد للبصون قسم الغرام في عهدو
ربيت الغرام ،،، تاتيو من في مهدو
قلبي رعاهو بازل عمرو ليهو وجهدو
وقتين تبا قام أعلن جحودو ولحدو
ضحيت بالسنين لي زول وهبتو حروفي
بهديهو الفرح ،،،، بلقاهو حارق جوفي
والخطر الشديد ،،، انا منو زايد خوفي
ليشن يا دموع فوق ريدو ناوية تطوفي
ما كّفاكي ظلمو ،،، ولا ضحالة وجعو
ولا كّفاكي قلبي البي الوجايع فجعو
اصدر اخر اصدار في العذاب البدعو
قال داير يتنقد و يحصد الما زرعو
صاح بالجد بريدو وكنت زولة وفيه
ومن بعد اليقين الريد بدور شخصية
ريدي الردتو ليك من ناحية انسانية
يوم الحق يحق انا فيهو رافعة قضية
إت واحد اناني ،،،،، بتستغل الطيبة
بينات الحشود ،،،،، الليلة ياني خطيبة
الريد لعنة والريد في الحقيقة مصيبة
بي فوق للتمن ،، دفعني تاني ضريبة
انفض الغبار ،،،،،، نطق السكوت الفينا
جيتكم يا خلق ،،،، والليلة فيني غبينه
أحرف شعري باحت فوق معاني رصينه
للمالك حياتي ،،،،،،،، ومفتكرني عجينه
أحرز ثم احزر ،،، واحترس من قولي
ببداء انفذ القول ،، في الكلام يا زولي
لو كان فتا ريدي وزدتا همي وهولي
بعلن للحداد ،،،،، بالحسرة بقرن حولي
بقفل باب هواك ، للبينا بضرب بوري
ما بقبل تهين او تنتقص لي شعوري
الريد البزل انا شايفة ماهو ضروري
بعدك لا بموت لا بطفي شانك نوري
وما تأمن قليبي الاحتواك بي حنو
والله العظيم لو قلبي قام لي جنو
عادي بكنصلك ،،، يا زولي احذر منو
اعزر يا الحبيب بي كلمة اوعي تفنو
بين الحب والكرامه هنالك تفاصيل غامضة يجب الوقوف عندها
حتي نتمكن من عبور جسر الوصل الي بر الامان
@الجميع
ليست هناك تعليقات:
إرسال تعليق