بالدارجى العميق
وتانى وقعت دانة
يوسف البروف
********************************
يوم امس الاحد الموافق 11/6/2023 سقطت دانة فى مدينة الازهرى على بعد 400 متر من بيتنا، الزول الجاى راكب مواصلات السلمة البقالة فى زلط قبال نهاية محطة البقالة بربط بين السلمة ومايو عند مخبز رزاز وصيدلية ابو المقداد(7), اها الشارع البربط بين السلمة ومايو ده بفصل بين مربع عشرة ومربع خمسطاشر وبين مربع تلطاشر ومربع اربعطاشر، بعد اندلاع الحرب تحولت هذه الساحة التى تمتد بين مخبز رزاز ومجمع الدوحة إلى سوق مصغر، اصلا المكان ده قديما كان موقف ركشات، طيب أصبح المشهد كالاتى، بتاع تكتك للخضار، كشك بتاع تلج، حاجة بتبيع الكسرة والويكة والتسالى، بتاع طعمية عندو تربيزة قدامو وصاج وانبوبة غاز وعيش للحشوات، كشك خشبى متهالك بتاع تلج، بتاع بطيخ، كشك بتاع رصيد واخر بتاع سعوط وفريشين مفترشين الارض والمشمعات وملتحفين الشمس والسماء باشكين حاجاتهم وبكوركوا فيها دى هدايا ومن الله جايا ورخا للنهاية، دل دانة وقعت فى نص المشهد ده فى نص النهار، حالا قتلت 16 نفر وجرحت العشرات، اربعة من اصحاب الركشات ماتوا من بينهم جارى(حنو) وزبونا سيد الخضار بتاع التكتك وبتاع الطعمية وبتاع الاقاشى وبتاع التلج والباقيين زباين، الدانة جات من السماء وسقطت قدام مخبز رزاز وصيدلية ابو المقداد(7)، الدانة دى جات من وين علمها عند الله وعند ناس الجيش وعند ناس الدعم السريع، المرة الفاتت لمن قلنا الدانة الكتلت ناس مايو ديك فكوها ناس الجيش فى بعض الناس قالوا لى عرفتها كيف فكوها ناس الجيش؟، عشان كده المرة دى قلنا دانة جات متلبة من السماء براها كده.
ناس الجيش برروا للحرب دى انهم دايرين يحررونا من الأجانب التشاديين والماليين والنيجريين وناس الدعم السريع برروا للحرب دى انهم دايرين يجيبوا لينا الديمقراطية، لا شفنا أجنبى شال بقجو وطفش ولا شفنا لينا حرية، بل بالعكس شفنا نهب البيوت وهدم البيوت وحرق البيوت واحتلال البيوت وشفنا الدانات والراجمات والطائرات والمتفجرات.
غوروا من حياتنا الى الجحيم انتوا الاتنين تلاحقكم دعوات الامهات المكلومات واللعنات فوق الارض وتحت الارض ويوم العرض.
السادة/ الامم المتحدة، مجلس الامن، الاتحاد الافريقى/ جامعة الدول العربية، محكمة الجنايات الدولية، مجلس حقوق الانسان، الاتحاد الاوروبى، دول الايقاد، الترويكا، المحاميين، الصحافة والاعلام، المنظمات الدولية، المنظمات الوطنية، الصليب الاحمر، نشطاء الميديا.
بعد السلام والاحترام والتقدير
نحن سكان مدينة الازهرى نطالب بلجنة تحقيق دولية فى هذه الجريمة التى ترتقي إلى جرائم الحرب وحفرة الدانة موجودة والشظايا موجودة ومخبز رزاز موجود وصيدلية ابو المقداد موجودة ومحلات كشك التلج موجودة ومحلات تربيزة سيد الطعمية موجودة ومحلات سيد الاقاشى موجودة واصحاب الركشات زملاء الضحايا موجودين وصيوانات العزاء مدقوقة وامهات الشهداء المكلومات موجودات.
لا للحرب
نعم للسلام
نعم للمحاسبة
نعم للمحاكمة.
ليست هناك تعليقات:
إرسال تعليق