فاطمة خاطر

 *ثورة دسمبر* 

الفرح المؤجل📌📌

    محمد السوداني شاب يعيش في دول الشتات والمهجر ،

بعد تفكير عميق ورجاء الوالدة والاهل قرر العودة لارض الوطن حتى يكمل نصف دينه ...

طارت ام الحسن من الفرحة وقالت: دا اليوم الدايراه ليك يا محمد مبروووك عليك...

بعد بحث وتنقيب وجدت الام ضالتها في امونة بت الجيران اخت العازة اسرة معروفة وطيوبة وبت اصول حسب مقاييس تلك الحلال ..

تمت خطوبة امونة  بهدوء من يخشى الحذر يعني ( فتح الخشم ) 

لم تسمع زغاريد ولم  توزع الحلويات والبارد تاجيلا ليوم الفرح الأكبر ولخوف ام امونة من العين والحسد آثرت ان لا تخبر أحدا..  

حتى تبدا مراسم الزواج وتهل البشاير  لذلك لم تفرح امونة الا في دواخلها فرحا مشروخ...

"جاء اليوم الاغر ووصل محمد البلد..

كل البلد مرقت وفرحت وتسابقنا الصبايا الا امونة!

 اقعدي عيب عاداتنا كدي اتقلي فرحت امونة فرحة معلولة... 

كل بنيات الفريق خمجن الدلوكة ورقصن الا امونة تكابد  القلق والحذر والفرحة المكبوتة  في انتظار الفرح الأكبر..  

غدا موعد اللقاء تزينت امونة واصبحت  تسارع الخطى.. 

دق القلب دق دق. فدق الباب دق دق..رقصت المشاعر بهجة   ممزوجة برهبة باول لقاء..

فتحت العازة البنت الصغرى الباب..

،رد العريس السلام: اااااهلاااااا بالعروسة!

تسمرت العازة ولم تطاوعها الكلمات في الرد!!

فتح اهل العريس (القيدومة ) او  الموعد المنتظر للفرح ولكن لمن؟؟

رد محمد لمن  فتحت الباب اولا حسب عرفنا يجلب البركة والحظ للمتزوجين!!

وايضا العازة كانت اوفر حظا من الجمال..

تاه الاهل وتاه الجميع في مشاعر فرح مبعثرة وتلاشت الابتسامة 

لمن يفرحون ؟؟

 هل نفرح لتفرح امونة ام العازة؟؟ او لا يفرحووووون اصلا..

ومازال البحث جاري عن الاجابة!!@@

هذا هو حالنا الان افراحنا مؤجلة..

سقط البشير لم نزغرد قلنا ابن عوف فقط بديل و وجه آخر للبشير وتسقط تاني 

وجاء العسكر وقلنا استبدلنا عسكر بعسكر وتسقط تاني وتالت...

وجاءت المدنية تمشي على استحياء ولم نزغرد..

اين دم الشهيد ؟ والدم قصاد الدم ما بنقبل الدية..ولم نزغرد...

جات لجان تفكيك التمكين فاستبشرنا باسترداد اموالنا المنهوبة وقبل أن نزغرد،

( نسمع )هناك بعض الخلل!

والان (ارضا سلاح )، وتوقيع جوبا وتباشير سلام سيكتمل قريبا وخوفا من المحاصصات  لم نزغرد..

في انتظار توقيع الرفيق عبد العزيز الحلو وعبد الواحد نور  .. 

...وهل يا ترى ستزغرد الكنداكات بعد ثلاتة  أعوام ؟

ام ننتظر رئيسنا المنتخب لنزغرد .

ام ستظل تلاحق الشعب السوداني دوما لعنة الفرح المؤجل ... .

ام ستتزوج امونة

ونفرح فرحنا المؤجل،

...فاطمة خاطر 🏮

#غدا ستفرح العازة