ثقافة حقوقية

• #ثقافة_حقوقية
• #نزار_عبدالقادر
• قرار مجلس الأمن (1-2)
• 
  
• س: في ضجة كتيرة حاصلة حول قرار مجلس الأمن الأخير، السبب شنو؟
• ج: أولا ياشباب لازم تعرفوا منو العامل الضجة دي ، العامل الضجة دي هم كوادر الجبهة الاسلامية القومية، والناس الكانوا منتفعين من النظام البائد، والناس الحار بيهم الدليل لا هم مع القديم ولا مع الجديد.
• وعشان تعرفوا تردوا عليهم، قولوا ليهم الكلام ده عشان تاني ما يفتحوا خشمهم
• س: نقول شنو
• ج: قولوا ليهم خلال فترة حكمكم يا ناس الجبهة الاسلامية القومية (30 سنة)، مجلس الأمن طلع ليهو 114 قرار ضدكم وكلهم تحت الفصل السابع من ميثاق الأمم المتحدة، وكان أخطر قرار هو القرار رقم 1590 الطلعوا سنة 2005م وعمل فيهو بعثة للأمم المتحدة معروفة بإسم UNMIS ودخلت معاها البلد قوات أممية جيش وشرطة، ياهي دي ذاتها الوصاية البتكلموا عنها.
• وقولوا ليهم القوة الأمنية المؤقتة لأبيي UNISFA دي ما جات أمبارح، دي قاعدة في البلد من سنة 2011، وحتطلع من البلد حسب قرار مجلس الأمن يوم 15 نوفمبر 2020م
• ولو سألوكم عن قوات الإتحاد الأفريقي والأمم المتحدة الفي دارفور UNAMID برضو قولوا ليهم دي ورثناها منكم، قاعدين في بلدنا من يوم 31 يوليو 2006م، ومجلس الأمن برضو طلع قرار وقال حتطلع من السودان يوم 31 ديسمبر 2020م الجاي، وكان من المفترض إنو تطلع يوم 31 أكتوبر 2020م ولكن عشان  "الظروف الاستثنائية" لجائحة كورونا وقفل المطارات بقى طلوع قوات اليوناميد صعب في الموعد المحدد ليها.
• س: طيب خلينا نتكلم عن القرار الجديد، منو  القال عاوز  بعثة جديدة للسودان؟
• ج: الحكومة السودانية
• س: عشان تعمل لينا شنو؟
• ج: عشان تساعد البلد في حاجات كتيرة
• س: طيب منو  الكتبوا أول مسودة لمشروع القرار؟
• ج: ألمانيا وبريطانيا
• س: وشنو الجديد في القرار  ده لو قارناهو بالقرارات الفاتت؟
• ج: فيهو حاجات كتيرة يا شباب بتختلف عن كل القرارات الفاتت أيام البشير، ودي حاجات لازم الناس تعرفها.
• س: شنو الحاجات دي؟
• ج:  أول حاجة الناس لازم تعرفها إنو القرار ده تمت صياغته لأول مرة فقرة فقرة بالتشاور مع ناس الحكومة السودانية ممثلة في وزارة الخارجية وبعثتنا الدائمة بتاعت الأمم المتحدة في نيويورك، ودي ما كانت بتحصل زمان، زمان كانوا ناس مجلس الأمن بيطلعوا قراراتهم وبفرضو تطبيقها علي ناس البشير جملة وتفصيلا ذي ما بقولوا وبدون اي نقاش.
• تاني حاجة، ناس مجلس الأمن أكدوا في قرارهم التزامهم بسيادة السودان ووحدته واستقلاله وسلامته الإقليمية
• تالت شئ: القرار ما جاء فيهو الدمغات الكانت موجودة في القرارات السابقة زي: 
• "الوضع في السودان بهدد الأمن والسلم الدوليين"
•  " وإذ ﻳﺘﺼﺮﻑ بموجب ﺍﻟﻔﺼﻞ ﺍﻟﺴﺎﺑﻊ ﻣﻦ ﻣﻴﺜﺎﻕ الأمم المتحدة" 
• ودي نقاط مهمة يا شباب للناس البقولوا إنو القرار الجديد طلع تحت الفصل السابع، وفيهو وصاية علي السودان وضرب للسيادة الوطنية ووووووو.
• رابع حاجة وآخر حاجة: القرار الجديد كمان ولأول مرة في تاريخ مجلس الأمن أعضاء المجلس إستندوا في صياغتهم للقرار لي طلبات رئيس الوزراء السوداني دكتور عبدالله حمدوك المتضمنة في رسالته الرسلها للأمين العام للأمم المتحدة أنطونيو غوتيرس بتاريخ 27 فبراير 2020م بإسم حكومة السودان أي بإسم مجلس السيادة ومجلس الوزراء وبإسم الحاضنة السياسية للحكومة ممثلة في قوى إعلان الحرية والتغيير، عشان كده لو لاحظتوا خلال الثلاثة ايام الفاتت دي ولحدي الليلة مافي جهة من التلاتة جهات إعترضت علي قرار مجلس الأمن.
• س: كلام جميل ومعلومات مهمة ما كنا عارفنها، طيب البعثة الجديدة  دي إسمها شنو؟
• ج: بعثة الأمم المتحدة المتكاملة للمساعدة في الانتقال في السودان وبالإنجليزي بقول ليها United Nations Integrated Transition Assistance Mission in Sudan (UNITAMS )  عشان بعدين تعرفوا المختصر ده جه من وين.
• س: مدة البعثة دي كم شهر ؟
• ج: 12 شهر كمرحلة أولية.
• س: هل القرار  ده صوتوا عليه ناس مجلس الأمن؟
• ج: القرار تم إعتماده من أعضاء مجلس الأمن بالإجماع، 
• س: شنو يعني بالإجماع؟
• ج: يعني ال15 عضو في مجلس الأمن، ومن بينهم أمريكا، وروسيا والصين، وفرنسا وبريطانيا كانوا موافقين 100% علي مشروع القرار، عشان كده ما كان محتاج لي تصويت.
• 
  
• س: القرار حدد أهداف البعثة بشنو؟
• ج: أربعة أهداف إستراتيجية هي:
• (1)  مساعدة السودان في الانتقال السياسي، والتقدم من حكم الفرد نحو الحكم الديمقراطي، في حماية وتعزيز حقوق الإنسان والسلام المستدام
• (2) دعم عمليات السلام الجارية الآن وتنفيذ اتفاقيات السلام المستقبلية
• (3)  مساعدة بناء السلام وحماية المدنيين وسيادة القانون ، وخاصة في دارفور والنيل الأزرق وجنوب كردفان
• (4)  دعم وحشد المساعدات الاقتصادية والإنمائية وتنسيق عمليات المساعدات الإنسانية
• 
  
• س: ممكن تشرح لينا كل هدف من الأهداف الأربعة كيف إتكتب في القرار؟
• ج: حاضر، الهدف الأول: مساعدة السودان في الانتقال السياسي والتقدم من حكم الفرد نحو الحكم الديمقراطي، في حماية وتعزيز حقوق الإنسان والسلام المستدام: والقرار قال عن طريق مساعدة الحكومة في تحقيق أهداف الوثيقة الدستورية، وعن طريق تقديم المساعدات الفنية والتقنية لصياغة الدستور القادم، والتعداد السكاني ، والتحضير للانتخابات بعد نهاية الفترة الانتقالية،وكمان ضروري البعثة تعمل علي  دعم حقوق الإنسان والمساواة والمساءلة وسيادة القانون المشار ليهم في الوثيقة الدستورية ، خاصة المتعلقة بحقوق المرأة واتفاقات السلام المستقبلية وده كله بالتعاون والتنسيق مع مكتب المفوض السامي لحقوق الإنسان في السودان.
• 
  
• فاصل ونواصل
• جنيف 7 يونيو 2020م