إصلاح ذات البين

• [= ياحليل الوليان البرجعو المرأة لي بيت راجلا =]
• 
  
• |||||||||||||||||||||||||||||||||||||||||||||||||||||||||||||||||||||||||
• مرة في واحدي زعلت من راجلا وجات بيت أبوها... عندها أربعة أخوان ووالدتها متوفية وأخوانا ما متزوجين...
• قطعت البحر لأن بيت راجلا بالشرق وبيت أبوها بالغرب وجات دخلت بيت أبوها. أها الولاد قالوا لي أبوهم البت دي جات البيت وهي اتشاكلت مع راجلا... أبوهم قال ليهم هي ما كلمتني وإنتو ما تسألوها... جا سلم عليها وقال ليها والله يا بتي الله جابك لينا... أصلو ماعندنا البيسوي لينا الملاح والبتعوس لينا الكسري...
• الصباح صحاها صلاة الفجر... قال ليها قومي صلي الصبح... بعد ماصلت شال الماعون وأداهو ليها قال ليها أمشي أحلبي الغنم وتعالي سوي لينا الشاي... أها حلبت الغنم وسوت الشاي... بعد ماشربوا شاييهم قال ليها باقي نحن عندنا زراعي في الجروف سوي لينا الفطور نشيلوا معانا وكمان بالمرة أملي الترمسة شاي سادة...
• أها المسكينة سوت الفطور والشاي ومدتو لي أبوها... أبوها قال ليها طبعاً أنا وأخوانك كلنا بننزل شان الشغل كتير وما بنقدر نخليك براك في البيت يلا شيلي الفطور دا وأبقي وراي....
• المهم مشت مع أبوها ووصلوا محل زراعتهم الولاد كل زول شاف شغلتو... البيقلع ليهو في كلتود وكوديق والبينقح ليهو في حوض... والبيكادِن ليهو في قرَّاع والبيمشُك ليهو في أبسيقة... المهم الأبو شال فرارو وقطع ليهو كم عود سواهن *(كاسِّق)* وبقي يقطع في الشدر والعشر ويقول لي البت شيلي *(أزرُبي)* وأداها شِعبِي... المهم المسكينة شغالة تشيل وترص وتتكِّن بالشِعبي.. لمن الساعة حداشر جات الأبو نادى علي ولادوا وقال ليهم: يا وِلاد.. جيبوا الفطور شان نفك الريق... أكلوا وشِربوا شاييهم وواصلوا شغلهم... لمن الساعة واحدة ضهر جات قال ليهم نمشي البيت خلاص الواطاة حرَّت... ولقط ليهو راس واقود مااااانع وختاهو لي بتو فوق راسا ورجعوا البيت... 
• البت المسكينة كثافتا جات واتجدعت فوق العنقريب زي الدِلِق.. طوالي أبوها جاها قال ليها قومي دُقِّي الويكة وعوسي الكسري شان الغدي... المهم قامت سوت الغدي وشربوا الشاي ساقا وأخوانها وأندلُّوا علي الجزيري ونفس الموال القبيل يقطع في العشر والشوك وهي تزرُب لمن خلاص الشمس بقت مغيب رجعوا البيت وهي خلاااااص الفيها كملت... ناولا الماعون وقال ليها أمشي أحلبي الغنم وسوي لينا شاي المغرب... حلبت الغنم وسوت الشاي وهم بيشربوا أبوها قال ليها: قومي عوسي لينا للفطير للعشي... المهم قامت ولَّعت دوكتا وعاست الفطير... وملَّحت ليهم العشا واتعشوا ورقدوا ناموا... الصباح عند الفجر أبوها جا يصحيها للصلاة لقاها مافي في عنقريبا... أها قطعت البحر القطعة الياها تاني الغرب ما جاتو...
• مما اعجبني فأحببت ان اشرككم به .