أشياء في الزمن الجميل تاريخ الحاضر

• 🖲 «الفضية» وجردل الطلس المورد في الركن داك ، الجردل ده لمن تشيل منه الغتاية بتجيك ريحة الكعك الناعم أبو سمنة داك ، أول ما تشمها بتذكرك كباية الشوب أم لبن مقنن والبنبر المنسوج من الحبال ..
• الجرايد زمان كان عندها قيمة وبيختوها خلفية للفضية .. الناس ما كانت شايفاها شينة نهائ .. 
• الجُككة «جمع جك» وكبابي العصير دي كانت بتطلع للضيوف كلهم غنيهم وفقيرهم .. كانت بتكون مليانة «روح فراولة».. وبتكون مندية لانه فيها تلجاية .. 
• الفناجين وبراريد الصيني وكبابي الصيني كانت برضو بتطلع للضيوف .. 
• السقف الشايفنو كلو قش و«مروق» ده .. كان أبرد سقف .. ولمن تفتح الشباك الاخدر أبو ترباس داك بتلقى نفسك ضارباك طراوة وبتاخد ليك غمدة سممممممحة .. 
• حتى الستارة المعلقة في مسمارين دي شايفنها حاجة سمحة وراقية شديد ..
•  الفضية دي لمن تكون عندك صورة حلوة وللا حقت زول بتريدو كنت بتغزها في باب الفضية دي ..
• الحاجات دي عندها ريحة بالمناسبة .. ريحة حقت حنية ومحبة .. أي حاجة في الصورة دي كان فيها ريحة المكان ومحبته .. حتى الونسة الكانت وسط الأوضة دي كانت بتكون حلوة وفيها نقاء كده عجيب .. كل حاجات زمان كان فيها شي من المحبة عشان كده بقت  جوانا ..💐