السودان جميل بعيون الاهل

• *🔵🔴الســـودان جميـل بس ما لقي العـون*
• 
  
• _🔖 رصـد: الهــندي_
• 
  
• 
  
• 
  
• الكوم الكبير بتاع المنقة في ابو جبيهة ب ١٠ جنيه ومافي زول دايرو وقاعدة تأكله الحيوانات الله يكرمكم سعر الكرتونة الفاضية ٢٠ جنيه وترحيل الكيلو ٧٠ جنيه عشان أزمة الجاز والله نهاية اليوم قاعدين يخلوها في السوق ويمشوا في الخرطوم دستة المنقة ١٨٠ جنيه
• 
  
• البطيخ في كتم شمال دارفور الحبة ٢٠ جنيه والله المزارعين بقوا ما قاعدين يحصدوا عشان تكلفة الحصاد اكثر من سعر البيع يعني بالخسارة وما قادرين يرحلوهو حتي لولايات دارفور الآخري عشان الترحيل والبطيخة في الخرطوم ٢٥٠-٣٠٠ جنيه
• 
  
• جبل مرة البرتقال جبال اصفر اخضر والنَاس بتتفرج تعاين وهو بيبوظ قدامها ما عارفين يعملو شنو 
• 
  
• دلتا طوكر الطماطم علي مد البصر  لا قادرين نصدر لا قادرين نكتفي والمزارعين يقولوا ليك نوديها وين الترحيل مكلف والشارع كلو رسوم وجبايات ورشوة وعلبة الصلصة ١٠٠ جنيه وظرف الكاتشب٣جنيه ونحن بالموارد الزراعية والامكانيات دي نفشل نعمل لينا مصانع صغيرة لتعليب الخضر والفاكهة او العصائر الطبيعية في مناطق الانتاج
• 
  
• القمح في ولاية نهر النيل بالأطنان قاعد في الخلاء والمزارعين يشكوا من كثرة الفئران والحشرات والخريف بدأ والمطر العدو الاول للحبوب لا البنك الزراعي اشتراهو ورحلوا لا عندنا صوامع للغلال عشان نخزن فيها لا عندنا مطاحن في مناطق الانتاج يعني لا قادرين نلبي حاجة السوق المحلي ويكون عندنا احتياطي ونمزق فاتورة الاستيراد لا قادرين نصدر منتجاتنا عشان ندخل عملة صعبة للبلد
• 
  
• يا حكومة يا وزارة الزراعة يا وزارة الصناعة يا ناس الانتاج الصناعي يا خبراء يا رأسمالية وطنية شوفوا حل والله العظيم في ناس شهور مافي فواكه بتدخل بيوتهم لانها مافي متناول يدهم 
• ياحمدوك يا ريس انت خبير زراعي يعني دا الكار بتاعك والمباراة في ملعبك شوف لينا علاج للمشاكل دي الغلاء طحن الناس لكن هم ملتفين حولك واملهم  فيك كبير والله العظيم بنقدر نعمل اي شئ في بلدنا بس بتنقصنا الإرادة والامانة تجاه وطنا
• والله العظيم حاجة توجع القلب وأخيرا لا نقول الا الحمدلله من قبل ومن  بعد
• 
  
• 
  
• 
  
• ⏬⏬⏬⏬⏬