السبت، 30 مايو 2020

الفشقة في عقدين ويوم

  • *الفشقة في عقدين ويوم*

  • في البدء بإسمي وبإسم سكان الشريط الحدودي بصفة عامة وسكان بركةنورين بصفة خاصة نشكر كل الذين وصلونا ميدانيا والذين يريدون ان يصلوا لكن ظروف البلاد حالت دون ذلك فاتصلو مستفسرين عن الاوضاع في الميدان نحن شاكرين ليهم جدا دورهم الوطني وغيرتهم على اهليهم وبلادهم وهذا الملخص للذين لم يتمكنو من المساندة الميدانية او حتى الاتصال 
  • عزيزي السوداني لازم تتفق معاي انو السودان كدولة ما عندها اي دولة شقيقة عشان ما يجي واحد يقول لي فلانة يا شقيقتي يا اخت بلادي نحن بنحلم ساي والدول في كل العالم في حاجة اسمها مصالح مشتركة وبس يعني ممكن الشقيقة تكون ابعد دولة منك جغرافيا والعدو اقرب دولة ليك ولا شنو يا ناس مصير واحد وعلاقات تاريخية واصولنا من هناك ( الواحد تلقاهو عشان جد حبوبة ام ابو جدو من هناك يقول ليك الدولة الفلانية اقرب لينا قوم يا عاطل )
  • طيب كدي نمسك دول الجوار السوداني 
  • مصر . . تحتل حلايب وشلاتين وابو رمادي واعلنت عدييييل رفضها رفع اسم السودان من قائمة الدول الراعية للارهاب (في زول سوي ممكن يقول دي اخت بلادي )????

  • ليبيا . . عشرات الفديوهات البتنشر يوومي لمهاجرين سودانين يتم القبض عليهم ونعتهم بألفاظ عنصرية بحت يا عبيد ويا ويا وكلنا ما بننسى لما قبضو شباب سودانيين وخلوهم عراية وبقو بولعو اكياس وينقطو فيهم النار يمكن واحد يقول ليك دا ما تصرف دولة طيب نشوف تصرف رؤساء القذافي دا عديييل قال نحن بناكل الجراد والفئران وبنرقص مع رئيسنا يعني بقى الشعب كلو كيزان هل في عداوة اكتر من كدة ? وقصة جنيه الكرامة اكبر عداوة 

  • تشاد . . دبي دا دعم التمرد سنواااات ولما قررربو ينتصرو بقى مع البشير ضدهم يعني باختصار ضد استقرار السودان 

  • جنوب السودان الاثنين الاسود خير شاهد ومن بعده احتلال هجليج وهسي احتلال ابيي رغم التقارب الاخير 

  • اثيوبيا . . المصيبة هنا 
  • انا شخصيا تعبت عشان اقنع الناس انو اثيوبيا دولة مستفيدة من علاقتها مع السودان لكن السودان ما استفاد من اثيوبيا 
  • اثيوبيا ياناس بتحتل اراضي طولها 267 كيلو يعني ابعد من مسافة مدني الخرطوم وعرضها 30 كيلو يعني مسافة الجياد الخرطوم 
  • الكلام دا من 1996م لغاية الااااااان 
  • هل في زول سوي ممكن يقول اثيوبيا اخت بلادي ????وفي النوع البشوف انو الثورة السودانية دي كلها كانت فشلت لو ما ابي احمد فكأنما ابي احمد هو الشال سلاح ضد الحكومة دي عشرين سنة او هو الطلع المواكب واسقط النظام او هو او هو 
  • نعم عندو دور كبير جدا ومقدر  لما جا اثناء انقلاب المجلس العسكري على الثورة وقدم مقترح بعد عودتو لاثيوبيا بس المجلس العسكري قال مافي زول يقدر يمليء علينا لا داخليا ولا خارجيا والصحفي سأل كباشي قال لي ابي احمد والاتحاد الافريقي قالوا وقالوا كباشي قال ليهو كائن من كان ودا بيعني انو مقترح ابي احمد مرفوض لكن موكب تلاتين يونيو رجع اي فار جحرو وبقو بفتشو في المبادرات القديمة وبعدين الناس ما عارفة كيف تشرف الحكومة الاثيوبية وكيف تدعم تهريب الدقيق والجازولين من السودان لاثيوبيا بقنوات رسميييييية واسألوا اولاد الحدود 
  • ارتريا . . اسياسي افورقي عداوتو مستمرة من زمن الكيزان وللان 

  • العرب . .  ديل بخدمو مصالحهم بس لكن نحن بنحبهم عشان حلوين لكن نهائي ما بخلوك تستقر يشتروك ويبيعوك  كمرتزقة
  •  يفتنوكم داخليا عشان تلجؤ ليهم في حل مشكلاتكم 

  • ليه يا ناس نحن ما نبقى زي سلطنة عمان ما عندهم عداوة مع اي دولة ولا عندهم عداوة بيناتم رغم تعدد المذاهب بين كم مذهب سني وكم مذهب شيعي وكم مذهب بوذي لكن متعايشييين وبحلو كمان في مشاكل الناس لانو اي دولة بتثق فيهم وورهم كبير في الاتفاق الننوي بين امريكا وايران 
  • وكانو محايدين في حرب ايران العراق 
  • محايدين في الحصار السعودي البحريني الاماراتي المصري ضد قطر 

  • نرجع لموضوعنا 
  • 1996م انسحبت المعسكرات السودانية المتواجدة في الحدود بين السودان واثيوبيا في منطقتي الفشقة والفشيقة بالقضارف  والجيش فات اتجاه الجنوب ايام حرب الجنوب وبقت البلد بي جاي مكشوووفة الكلام دا خلى الحبش يطمعو فيها لتلاتة اسباب 
  • الاول .  اخصب اراضي السودان 
  • التاني .  عدم وجود الجيش 
  • التالت .  اثيوبيا كلها هضبة ما عندهم اراضي زراعية الا هنا 

  • بدأت الاعتداءات من الزمن داك وبعض المزارعين الاراضيهم في الحدود خلو الزراعة وفي ناس واصلو لكن كثرت الاعتداءات لغاية سنة 2000م كل الناس وقفت في الفشيقة بالذات والحبش بدو الزراعة من  فوق وبعد سنتين زرعو كل المنطقة ونحن كمواطنين بدين نسك حكومة الكيزان يا جماعة اراضينا  عووووووك لكن زووووول شغال بينا مافي والحبش كان بزرعو زراعة يدوية ساي بعد شوية اتطورت بقت الية وبعد شوية جو تجار كبار برؤوس اموال ضخمة بقينا نشوف الضوي بتاع التركترات هناااااااك بتزرع والصوت يدق ليك فيييي اضانك لكن مافي اليد حيلة بعد تلاتة اربعة سنوات اثيوبيا بقت من الدول المصدرة للسمسم وبقو بجيبو عمال من السودان اي والله 
  • حكومتهم ساعدتهم بالتسويق وجات شركات اسرائيلية بقت بتشتري بالسعر العالمي واشتهرو مزارعين حبش وبقو اثرياء في تلاتة اربعة سنوات مثلا 
  • اشاقر 
  • ابا قدي 
  • ملس 
  • ابا نقا 
  • مشاج 
  • تيدي 
  • باشا 
  • بقو مليونيرات وبنو ابراج في اديس والحكومة الاثيوبية ساعدتهم تاني بي حاجة اي زول وسع زراعتو في كل عشرة فدان عندك حق بالقانون تمتلك كلاش وعشرة افدنة كلاشين والله البزرعو قصاد بركةنورين فيهم واحد عندو زي الف فدان يعني دا بكون عندو مية مليشيا مسلحين 

  • المهم نحن ما سكتنا وعوووووك📯📯📯📯📯📯📯
  • لكن صوتنا ما وصل نهائي لامن بدت تطلع اشاعات انو البلد دي مؤجرة للحبش 
  • المهم لما ازعاجنا بقى كتير الحكومة السودانية اب سوري عصابة الكيزان وحكومة الامهرا بقو بجرجرو فينا من شهر اربعة يبدو المفاوضات وتستمر لغااااية يجي الخريف واللواري تقيف والملف يقفل تاني الا السنة الجاية ونفس السيناريو لمدة ستة سنوات هرمنا ملينا فترنا ابهاتنا نصهم ماتو ياخ والواحد فيهم يمني النفس يدفن في بلادو 

  • لما تم انتخاب كرم الله واليا للقضارف صرح قال الواطة ح ترجع والشالو بالقوة يرجع بالقوة خلاص ناس الطيب مصطفى واسحاق احمد فضل الله بقو بكتبو كرم الله يعلن الحرب والراجل دا لا يصلح ووووو واصلا هو ما دايرنو ناس الانقاذ رغم انو هو كوز الزمن داك لكن لاحقا انسلخ وفي جهة تانية حرضت الاحباش بقو لما الخريف يقرب يجو يخوفو في المواطنين ويخطفو ويقتلو عشان اصلا ما تفكر في الزراعة همك كلو الامن بس الكلام دا بدا من قبال سبعة سنوات  الحكومة بعد ضغوطات وافقت انها تدي اي قرية عدج من الاسلحة الخفيفة للحماية واولاد الحلة ما قصرو حمو والله اهلم يعني نحن سنويييييييا القصة بتتكرر والحصل امس في مسقط راس ودوي صرخة ميلادي الاولى ما هو الا تكرار للذي يحدث سنوووووويا لكن هذه المرة الامرة اختلفت لانو زمان الجيش الاثيوبي بدي المزارعين اسلحة وبساندوهم لكن المرة دي نحن الضاربونا ديل هم الجيش الاثيوبي ما فيهم الا اربعة تنفار مليشيا الخمسمية كلهم جييييييششش ياناس اي والله جيييييش 

  • طيب القصة بدت كيف السنة دي 
  • يوم الاربعاء 29/مايو/ الحبش جو بركةنورين مع المغرب لقو شباب دون العشرين في النهر (نهر عطبرة حياتنا وسر بقائنا) بدون السبب لاحظ بدون سبب اطلق فيهم النار وضربو واحد في رجلو اسمو حسين احمد باسو 
  • اجري اجري اسعفناهو وهسي في القضارف 
  • تاني جو الحبش وهم اربعة تنفار جو راكبين تراكتور للحلة دايرين يشيلو موية القائد من بعيد قال ليهم يرجعو لانو الحادثة الحاصلة امس ممكن تؤدي لنهايات كارثية لكن ركبو راس والقائد قال للمتطوعين ديل اطلق نار فكو ذخيرة الحبش جرو خلو التكرتور مشو عندهم معسكر حق جيش اثيوبي فيهو زي خمسمية عسكري مشو كلموهم وهم على بعد كيلو بس من بركةنورين يعني اتوغلو دااااخل الاراضي السودانية لمسافة كم وعشرين كيلو وعملو معسكرهم المهم جو وارتكزو في الضفة الشرقية ناسنا ارتكزو بالضفة الغربية الحبش بادرو باطلاق النار وناسنا رغم انو عددهم كم واربعين بس لكن والله رجال واولاد رجال صمدو تلاتة ساعات متواصلة والحبش ما قدرو يعملو اي حاجة حتى التراكتور ما وصلوه ومات منهم عدد ومننا ضربو جنابو كرم في بطنو واسعف لمدينة دوكة لكن بعد وصوله هناك استشهد له الرحمة والمغفرة بعد استشهادو الجيش السوداني حس بالخطور رسل ١٣ عربات فيها دوشكات ورشاشات فيها سرية واحدة كلها واستمر التبادل وسط تكبيرات المواطنين لمدة اربعة ساعات اخرى والحبش بدو يتراجعو في واحد ملازم لاحظ انو في حبشي ارتكز من بدري في محل كدة وهو اكتر واحد تعب السودانيين المهم قال للناس ركزو على المحل دا وفعلا ملوهو ذخيرة لما الحبش اتراجعو مشى الملازم في موقف بطولي ومعاهو تسعة اخرون وصل للمحل واااقفا ولقى اربعة حبش ميتين وواحد مضروب وما مات تموه وحابو قناص وقرنيت ورشاش 
  • الحبش بعد التراجع لقو عندهم خسائر كبيرة رسلو لقوة زيادة جابو ليهم زي ٢۰۰ باحدث الاسلحة وهم بهناك دعمهم سريع لانو عندهم طرق سفلتوها داخل الاراضي السودانية من قبال عشرة سنوات المرة دي ضربو الحلة بالهاون وبعد تعب اقنعنا امهاتنا والشفع انو يمرقو المعركة دي بتختلف من المعارك السابقة يلا اللواري والمواتر بدت تنقل الناس ورفضو يمشو اي قرية قعدو في الخلا في هاون وقع في بيت واحد اسمو عوض حسين كتل ولدو وعوق مرتو وطفلو الصغير 
  • وهاون تاني وقع في بيت واحد اسمو النور كتل ولدو وعوق التاني والملازم الجاب الاسلحة ضربوه بعد جا راجع في رجلو وبرضو من المجرحين واحد اسمو محمد ابراهيم وواحد اسمو مصطفى شكا لكن هسي كويسين 
  • اهلنا طلعو برا الحلة والله ناس القرى المجاورة طوووول النهار بنقلو في الاكل والشراب من كل القرى خاصة 
  • مشرع الفرسان 
  • ابوعليلة 
  • ام ديسة 
  • جبل قنا 
  • سرف عرديبة 
  • تبارك الله 
  • القريشة 
  • كاكوم 
  • وقرى كتييييرة بسم الله ماشاءالله 
  • المغرب الحبش رجاو ورا  والمعركة وقفت باقل خسائر الحمدلله وقالوا في قوة جاية والجيش ح يقطع النهر وح يلاحقهم ويدحرهم بعيدا من السكن وناس الحلة ارتاحو للكلام دا لكن للصباح ما قطعو البحر وجات اوامر عليا انو في وقف اطلاق نار وفي جولة مفاوضات في الخرطوم 
  • الليلة والي القضارف زار القرية ومكان الاشتباك ومعاهو قائد الفرقة الثانية مشاة وقائد اللواء السادس وتحدث وتحدث لكن بالنسبة لينا لم يقل شيئا لانو الحبش ما مشو بعيد رغم انو الناس رجعت البيوت والجيش موجود لكن ننتظر ونشوف البحصل شنو في الايام الجاية 

  • الرشيد عبدالقادر 
  • بركةنورين

ليست هناك تعليقات:

مشاركة مميزة

في قعر ركوبة ست الشاي

 في قعر راكوبة ست الشاي جمبت ستنا                             مآآآآآآآ حارتنا  و بِنريدآآآآآآآ    !!!!!!! لبعض الأوباش في حارتنا وحدتنا الذي...

Post