مغترب دقت ليهو بتو فتح الخط قال ليها :
الغني قالو ف الرضي والقناعه مراتب
والجوه الكتاب ،،، بتعري حال الكاتب
قبال ما حروف نمك ،،،، تلوم وتعاتب
انا يابتي لسع ،،،،،، ما صرفت الراتب
البت قالت :
ما دقيت عشان اطلب واقولك حول
دقيت اشكي من زمنا مغايسو تهول
يا متين يابا في البلد البعيد متجول
يمن سافرت، ما قلنالك اوعى تطول
المغترب...
بعد ما بدري كنتي علي المحن صباره
جايه تدوني الحسره ،،، وتسيها عباره
حروف نمك ،، مستفه بالملامه خباره
ما درنا السفر ،،،،، علا الظروف جباره
البت...
ليالي البين بعد فقدك ،،،،،،، ليالي عتيمه
وراك فاقده الكتيبه ،، الكان بمشهد تيمه
وراك كل الخلايق ،،،،،،،،، شبعوني شتيمه
ابوي عايش واعيش ف الدنيا كني يتيمه
المغترب...
ابوك الدنيا ،مابيه تجيهو زي ما دار
عايش فيها بين محنه وضياع وودار
دام دعت الظروف نرحل نسيب الدار
امر اللقيا ،،،،،،،،،، متروك تاني للاقدار
البت :
دام ارزاقنا ،،،،،،، عند الكل حي بِدعيهو
يا يابا التباعد ،،،،،،،،،،،، تاني ايه داعيهو
بقيت يا الناسي حالنا ومابي م تراعيهو
لا حي يُرجي ،،،،، لاك ميت نقوم ننعيهو
المغترب..
عارفين المقادير ،،،،،،،،، نحنا ما بنختارة وعارفين تارة تبكي وبرضو تضحك تارة
اما نعيش معالم ،،،،،،،،،،، نرشد المحتارة
ولا الموت اخيرلنا ،،،،،،،،، والقبور ستارة
❤❤❤
ليست هناك تعليقات:
إرسال تعليق