حبي للقب ابو ام سلمة
وقتها وكان عمري لا يتجاوز ال١٠سنوات أو أقل ببسيط
والدي ربنا يديه الصحة والعافيه معجب جدا بالأمام الصادق ومش كدا وبس كان بمشي الجزيره ابا بحضر دعوات الإمام الهادي طيب الله ثراه
ولمن صحيت من جهلي لقيت صور الأأمه من الإمام المهدي عليه السلام إلى الأمام الصادق عليه الرضوان
معلقات في حيطه بيتنا
انا حسب جهلي وبحكم ولادتي في عهد الإنقاذ كنت بفتكر عمر البشير دا هو الشخص الأول في السودان بقول لأبوي انت ي ابوي كل مره تسمع الأخبار بتقول (هيي ابو ام سلمة حل حلالي) انت ابو ام سلمة دا منو؟
وهل أكبر من عمر البشير؟
طبعا اي نشره اي شي يجيبو فيهو اسم الحبيب الأمام القى ليك ابوي دا متكيف جدا بعد كبرت ولله الحمد بقيت ابحث لوحدي عن من هو أبو أم سلمة
لقدام وفي الثانوي عرفت انه في ثوره مهديه وفي حروب قادها الأمام المهدي وفي تفاصيل كتيره
بعد داك عرفت ليه ابوي متكيف اتاريهو م تكييف وبس الشي دا فيهو نوع من الروحانيات والمبدا الثابت
زول امي لا قرأ ولا شاف القرايه لكن شايف الصاح ومتبعه وفي يوم من الايام ناداني بعد عرفني اني ح اخش الجامعه قالي ي ولدي انت الوحيد الفي اخوانك الممكن يقرأ الجامعه اوعك (تلحد) طبعا كلمة تلحد دي هو عندو ليها فهم براه وفيما معناه اوعك تشلخ الدرب ودي برضو ناس Ibrahim Mohamed Ibrahim عندهم ليها تعريف
المهم خشيت الجامعه ٢٠٠٩(ام درمان الاسلاميه) وبقيت متشنج جدا واتفصلت قبل اكمل عامي الأول ومنها خشيت جامعه سنار كليه التربيه سبحان الله اول دخولي صادفت ليك المولد وفيهو خيمة الأنصار مشيت حضرت وشايف ليك الإعلام بتاعة حزب الامه في السماء
طوااالي بالليل داك اتصل لأبوي حكيت ليهو حكايه المولد والإعلام اسمع ليك صوت ابوي يبكي من شده حبو للأنصار وفرحتة بولده الحيشيل الشيله معاهم
قالي ي ولدي انت خلاص وصلت تب ربنا يعدل طريقك
ومن ديك أصبحت الصباح لاقيت زول اسمه الطاهر إدريس وبنت اسمها غاده محمد عثمان من سقدي
قلت ليهم انا حبيب الناس ديل من الفرح قربو يطيرو
اها غاده دي م صدقت😃 طوالي بدأت تحفظني ليك كولنات الكلام دا وانا برلوم لكن برلوم واعي وواقعه ليهو
بعد تلاته يوم حرقت في واحد حبيب اسمه ود الصادق قال الرفاعي دا يشتغل لينا كادر تحتي الهم م عارفنو انا زول شفقان شديد بتشيلني الهاشميه ألناس ديل في أول تلاته يوم بقيت اصفق معاهم ومن ديك عرفت صحي الابو دا نعمه من ربنا انه يمسكك طريق الهدايه والف شكرا ي يابا انك مسكتني الدرب ألما بودر
كوادر حزب الامه القومي مفترض زول يوميا يعمل جرد حساب في العمله في حياته دي
لأنه الأنصاريه دي رأس مال دنيا وآخره والانصاريه ورثناها من ناس كانو لا يعرفون للمال والترف درب
َكانو زاهدين في كل خيرا فيها مقصدهم الجنه
الحمدلله الذي خلقني انصاري وحزب امه قومي
#شكراً_يابا
ليست هناك تعليقات:
إرسال تعليق