حليل زمان
Areej Ali
✍️اريج على
❤️حليل زمن الدافورى واللوارى بتضرب البورى
❤️ناس كثيرة ستجد نفسها مع هذا المقال و تستعيد شبابها
❤️خواطر جدو
❤️ونسة مع جدو يحكى لى ما قبل ظهور النت و الموبايلات والفضائيات
❤️جدى قال :
🔶 الكورة يا حليلا والناس الكانو بلعبو كورة يا زمن جوز الحمام ثلاثة يا حليلهم العرس عَرس والاغترب اغترب والمات مات ,, وبعد تجى من الكورة تجى زى الشيطان مغبر من فوق لى تحت التقول طالع من قبر وتمشى تشطف والله انا اخر مرة اتشطنا بتين زاتو ما عارف ويجى المغرب طبعا اغلب الناس كان عندهم شاى المغرب ده اساسى والله للاسف نحن ما كان عندنا وكنت بتمنى يكون عندنا بس الحاجة ما كان بتسويهو ,, ! لانو قعدة شاى المغرب دى لزيزة بشكل جميل لانو اغلب الاخوان بكونو جو من الشغل والونسة بتكون عندها طعم خاااص .. المهم بعداك كان لو عندك قراية تمشى تقراها وكنت بتحجج بى انى يا ماشى اجيب كراس من صحبى يا امشى للحاجة اقول ليها ماشى دكان الجعلى اجيب العشاء ولمن تشيل الجك وتمشى على دكان الجعلى من الفرحة التقول طالع من معتقل تمشى على دكان الجعلى تلقى الامة والعالمين كلهم مركلسين هناك تاخد حنك مع كده وتشاغل ده وتتونس مع ده وتقيف مع ده تلقى الساعة 9 جات تجى راجع تخت العشاء فى طربيزة المطبخ وتمشى تتم قرايتك وطبعا نفسيات. مافى للقراية بس الحجة صعبة والشى البغيظ تلقى ناس البيت كلهم قدام التلفزيون طبعا ده قبل الديجتل وياالله من مسلسل الساعة 9 ما الساعة 10 بالتوقيت الجديد لانو التوقيت الجديد لى الان ما راكب لى فى راسى . ومسلسل الساعة 9 كان كل ناس الحلة بحضروهو قايتو انا كنت بتكيف للمسلسلات السودانية ناس دكين واقمار الضواحى ولى فرقة الاصقاء المسرحية " متاعب " ما علينا المهم حجات زمان دى كان ليها نكهة خاصة بعداك العشاء .. والعشاء كان بيكون مظبط بس صراحة هسى بقى ما مظبط زمان كان بيكون فى دكوة وبيض بالطوة والفول كان بكون مظبط ولو فى حاجة تانية زبادى لحمة طائرة بتكون فى بس بقى بالكتير صحنييين وما مظبطين حاجة كده على الماشى إلا مره مره بعداك الاخبار كان فى تلفزيون السودان زى المسلسل بعد داك كنت بنوم طوالى يعنى ارقد طوالى بنوم يعنى بالكتير الساعة 10 ونص بالقديم طبعاً البال كان فاضى وما كان فى اى هم بس هسى والله الساعة 1 ولا 2 لو ما جات النوم يقول ليك كان نطقتا بعد داك ترقد تنوم والنوم زاتو كان جاك بالساهل الكلام ده قريب لحدى 2005 كان فى بس بعد 2005 الحالة بقت صعبة والله
❤️ومن الحاجت المشتاق ليها زمان كان بتلقى الشارع مليان وفى حركة فى الشارع يعنى فى حياة ,, يعنى مثلاً تجى ماشى فى الشارع تلقى فى شفع بلعبو يعنى مثلا لعبات ناس زمان ديك هسى بقت مافى ناس كمبلت وصفرجت وام زراير والبلى وتك تراك .. وطبعا الحجات دى كان مؤاسم يعنى اى لعبة بى زمنها واحلى لعبة كان بتكيفى فلفلت ياخى طبعا كنت خبير فيها شديد وكان مع بداية الشتاء كده كان بنعمل الصورايخ هسى يا ربى الحجات دى مشت وين ولا الشفع ديل وين ولا مع البليستيشن والاتارى والحجات التانية نرجع للحجات الكان فى الشارع كان تلقى فى الشارع اتخيلو معاى فى الحتة دى ... كان تلقى عمك مثلاً عبدالقادر تاكل ومطلع كرسيهو وجمبو عمك ادريس والطربيزة فى النص وفيها جك الموية والقهوة وبهناك بتلقى الشفع بلعبو وتلقى ناس منى عندهم بارتى هسى عليكم الله البارتى ده وين وتلقى ناس محاسن عندهم ضيوف والعربية قدامهم وجنب بيت ناس حليمة حمار اللبن واقف وببيع فى اللبن وبهناك عمتك هدية جاية من المستشفى وبهناك ناس رشا عندهم حفلة والله الحفلة زمان ما تلقى فيها حتة تخت فيها رجلك كان عندها نكهه زاتو زمن الشعر الخنفس و الشارلستون والماكسى وتوب السارى وشبشب دكتور شول بس هسى الكراسى فاضية والجيران بقى ما بجو وفى بيت ناس عمك محمد ولدو عمار جه من السعودية وفرحانيييين بى جية ولدهم وبى هناك ناس شوقى سافرو عطبرة عندهم وفاء هناك .. وبى تحت تحت كان بت ناس (( ........... )) حاتم ود الحلة التانية مجكسها ومافى زول عارف لانو طارق ود جيرانهم لو عرف كان بشاكل حاتم بس هسى اختلط الحابل بالنابل وبقى طارق هو المجكس (( ........ )) ههههه , طبعاً الزول كان ملم بى شمارت
❤️مشتاق لى يوم الجمعة وياااااه من يوم الجمعة كان برنامج براهو وكان احلى حاجة فيهو فى دراما بجيبوها زى الساعة 3 ونص بعد عالم الرياضة وكان يوم الجمعة ده طووووووالى بيكون فيهو ضيوف هسى فى الشهر الفيهو 4 جمعات ده بتكون فى جمعة واحدة بس فيها ضيوف ومزكر كمان يوم الجمعة كان بنمشى المنتزة ياخى يوم المنتزة ده يوم براهو ياخى المواصلات زاتها كان ليها نكهه ياخى اى حاجة ليها نكهه زمن التاتات ايييييك والله ولمن نمشى المنتزة الفرحة كان ما بتتوصف ,, هسى زمن يزكرو فيهو المنتزة ساى مافى ياربى يكون من شنو ؟ ما علينا ومشتاق لى يوم الجمعة الكان بمشى فيهو السوق الشعبى امدرمان الملجة ياخى الملجة كان عندها طعم الخضار ده مفروش فى الواطة والناس بتكورك ياخى دى براها حياة خليك من اللوارى البنزلو فى الخضار ولا مؤسم الشمام ولا مؤسم البطيخ اى حاجة كان ليها موسم قايتو الله يرحم الايام الجميلة دى هسى ووووووين تانى
❤️الحلة كلها لانو الناس كان الناس بتتواصل وبتعرف اخبار بعض ,, بس هسى اجاركم الله الزول بطلع من الصباح وبجى راجع ومافاهم اى حاجة وبجى زول نوم بس ,,, عليكم الله الحجات دى ما تستهل الزول يشتاق ليها ؟؟؟
❤️مشتاقه لى يوم العيد ورمضان لمن رمضان كان قبل شهرين الناس بتستعد ليهو زمن كان بتمشى فى الحلة قبل شهرين وتشم ريحة الابرى يعنى كان اى اسرة بتعملو بس هسى الناس بقت تشترى الابرى اول يوم فى رمضان الساعة 2 وتبلو وتشربو ده اصلاً اذا كان عندهم نية يشربوا ابرى والحاجة الالز كان شفع الحلة قبل شهر برصوا الجامع بتاع الفطور بالطوب وبدوهو رملة ظريفة كده ومزكر كمان فى شفع بجيرو الطوب وكان فى تنافس بى كده بس هسى الحجات دى مافيشة تكون من شنو ؟ وكان الناس كلها بتفطر بره والما بفطر برة ده الناس كان بتقول عليهو راجل خائب وما راجل حتى لو عندك ضيوف كان بتجيبهم بره مع ناس الحلة بس هسى اغلب الناس بقت تاكل فى البيت والبطلع بطلع زى المجبور ومشتاق لى يوم العيد لمن العيد كان عيد كان عيد عيد الفطر احلى من عيد الضحية لانو كان الزول بلبس فيهو الجديد وكان بجى بعد فترة طويلة الشى السمح كان بتلقى قبال العيد الناس كلها فى السوق والمغالق مدورة بوهيات ساى وكان فى الحلة بتلقى بيت ولا بيتين بس ما جيرو البيت هسى فى الحلة بتلقى بيت واحد بس بيكون جير البيت ولا علشان العيد علشان خامس يوم ولا سادس يوم عندو مناسبة ياخى العيد زاتو كان 4 ايام هسى بقى من صلاة العيد لحدى الفطور وبس
❤️مشتاق لى فتحة النور البدرى مع الصباحية ديك وفوق لى ده فرحة انك مسافر البلد تجيك مع الصحية الصباحية . بعد داك تمشى تصلى الصبح وتشيل شنطتك وتبقى مارق على سوق ليبيا وياااااه لمن تجى ماشى مع الصباح كده قبل ما الشمس تمرق وفى الشوارع الضيقة ديك بتاعت الحارة 17-16 ومع نور العربية تعاين للبيوت دى التقول ما فيها زول ,, وتمشى الموقف وأأأأه انا من حلاوة الموقف مع الصباح واهم حاجة تشرب الشاى هناك مع اقرب ست شاى والناس تكورك ودخلة الباصات السياحية وانت فى حالة انتظار تام لى انو الباص يجى من السجانة .. لكن الاجمل الباصات القديمة ديك بتاعت الصناديق الصفر ديك ويلا وانت ماشى على الباص ده براهو احساس جميل ما بتوصف .. وتركب الباص وانت فى حالة فتيش لى مقعدك لحدى ما تلقى مقعدكـ ,, والباص يدور ويبقى مارق مع صوت البورى وصوت البورى عندو انطباع ما بتوصف والالز من كده انك تشيل معاك جريدة وتقراها فى الباص والباص ماشى ,, ود لسه الشمس ما شرقت وشوية شوية الواطة تتفتح وفى النائم وفى البتونس وفى الحاجة البترطن وفى الشافع الببكى وفى قفص الجداد وفى ريحة ناس البلد .. طبعا ريحة خااااااصة كده هسى انا ما عارف مع الباصات الجديدة والسياحية دى اختفت وين .. قايتو ما علينا .. ولمن تصل البلد كان الز حاجة مع الباص كان بصل مع الضهرية كده والاجمل من كده انو بتاع الباص بنزل اى زول قدام خشم بيتو عليكم الله فى حنية اكتر من كده هسى من الزلط واى زول بتصرف براهو الناس دى مالا بقت كده ياخ ؟؟
ليست هناك تعليقات:
إرسال تعليق