*من طرائف شارع مدني الخرطوم*
هناك اعتقاد طاغي بمناطق قري الجزيرة علي طول زلط شارع الموت بان الخدمة السريعة الممتازة و أهم وأسرع خدمة تقدمها لمن ينجو من الحادث هي *كف صاموتي* سريع اذا بدت علي الشخص اي بوادر زهللة !!!
حدثني أحد أصدقائي بحكاية طريفة
قالوا الرياضي الإعلامي المشهور بومدني (مدثر القطر ) كان راكب مع صحفي ماشين لي مباراة في الحصاحيصا
وعربية الصحفي انقلبت قرب إحدى القري
والصحفي مرق من العربية سليم كويس جدا
وتدافع المواطنون لتقديم أهم واسرع خدمة ألا وهي المبادرة بالكف اذا ظهرت من الصحفي اي كلمة ما في محلها.....
وسألوه سؤال استكشافي.....
اها يا زول إنت كيف ؟؟
مع انو كان واقف علي كرعيهو ولا نقطة دم مافي. ...لكن لابد من الخدمة الهامه وعلي وجه السرعه وقبل فوات الاوان والزهللة
الصحفي قال ليهم
أنا كويس..القطر كيف ؟؟
وعينك ما تشوف الا النور
والناس البعيدين بكوركو لي الناس القريبين حصلو الزول خارج الشبكة 😄
يا جماعه الزول ده زهلل
حصلوهو سريع
قطر شنو يا زول ؟؟؟
قول بسم الله
إنتو جيتو بي عربية صالون !!! وتاخ كفوف صاموتي
وبعد ان تلقي الصحفي الكفوف كالمطر أدرك مؤخرا سوء الفهم الذي حدث وحاول يزيلو ..وياريت ما حاول
:--يا جماعة انتو ما فهمتو كلامي....القطر كان معاي في العربية
وهنا تتعالي الصيحات من الناس
لا حول ولا قوة الا بالله ....
قطر شنو يازول المعاك في العربية....؟؟؟
قول بسم الله
قول بسم الله
قول بسم الله
وتلقي صاحبنا زخة أخري حامية من الكفوف ... .
حتي جلس علي الأرض ووجهه الي الارض وكلتا يديه جعلهما حماية للوجه ..
لمدة أسبوعين....... لم يكن صاحبنا يعاني من أي ألم من آثار الحادث إلا الخدود المتورمة والزنة في الإضنين من اثر الكفوف التي تلقاها !!!.
😂😂😂😂😂😂😂
ليست هناك تعليقات:
إرسال تعليق