أنا منو؟
انا مروة بابكر البت الاهلها دعموها مشت كابست سافرت امريكا براها وعملت ماجستير في علوم المخ والاعصاب وحاليا بتحضر للدكتوراه عن طريق منحة ❤.
انتو منو؟
انتو الشباب الحتكابسو براكم وتجتهدو لحد ما تصلو للحاجة العايزنها، مش كده؟ 😉
(ما تسمعو للناس المحبطين وما تخلو زول يقيف في طريق احلامكم، ولكل مجتهد نصيب)
كل الحب ❤️❤️❤️
* انا قريت طب، اول سنتين قريتهم في جامعة سنار وتاني حولت جامعة الجزيرة واتخرجت منها ٢٠١٢. قالو لي احسن حتة في التعليم والطب هي امريكا حاليا، وانا كنت حابة المخ والاعصاب شديد فختيت هدفي اني امشي امريكا (لازم تعلو سقف طموحاتكم اول شي).
* بعداك بديت اكابس في النت واسال الناس امريكا دي بمشوها كيف (كنت بقدم للوتري لكن طبعا ماشالوني). قررت انه اعمل ماجستير بتاع مخ واعصاب في جامعة ومشيت ابحت في الجامعات في النت واعرف شروط القبول شنو ومتطلباتهم شنو ورسومهم كم وكده. كلمت اهلي بالحاجات دي وقالو لي نحن بنساعدك بكل البنقدر عليه انتي بس شوفي باقي الشروط وجيبي القبول. للناس العايزة تحضر برا صراحة انا في موقع ساعدني شديد! بتكتبي فيهو انت عايزة تحضري شنو (كل التخصصات ما طب بس وما علمي بس). وبقومو بوروك كل الجامعات الفيها التخصص ده، وشروطهم شنو ورسوهم كم وكل المعلومات المطلوبة. هدا اللينك للناس الحابة تبدا:
https://www.gradschools.com/
* لقيتهم طالبين انجليزي (ايلتس ولا توفيل) وطالبين امتحان اسمه ( Graduate Record Examination) GRE،امتحان تقييم الخريجين بتاع انجليزي ورياضيات، وطالبين معادلة للشهادة حقتك ويكون معدلك بعد المعادلة حوالي 3.00 (في جامعات تانية بتقبل بمعدلات اقل).
المهم انحبست كم شهر قعدت اقرا في الايلتس والحمدلله جبت سبعة ونص وهم كانو طالبين ستة ونص. يلا للناس الدايرين يقرو برا دي اووووول خطوة لازم يعملوها: الانجليزي الانجليزي الانجليزي! لو انجليزيك كويس ممكن في كم شهر زيي تتعصرو عشان تعرفو التكنيك بتاع الايلتس والتوفيل (انا قريت من كتاب اسمه Barron's IELTS). ولو انجليزيك ما كويس برضو ما مشكلة اساسا انا من ما خشيت الجامعة بديت امشي اقرا في معهد انجليزي، وعلى سنيني الاخيرة انجليزيني بقى كويس الحمدلله وحبيت الانجليزي وقمتا اشتغلت مدرسة انجليزي في مدني (بمشي الجامعة بالصباح وبدرِّس في المعهد بالعصر). فاي واحدة دايرة تصلح انجليزيها انا بنصحها انها تخش معهد انجليزي، لانه في المعاهد بوروك الصاح والغلط شنو وبتلقي طريقة تمارسي فيها اللغة شوية. فبعد مايتصلح الانجليزي شوية ممكن طوالي بعدها تقري للايلتس ولا التوفيل.
* يلا بعد انتهيت من الايلتس جيت للامتحان التاني ال GRE، وانا كنت شايفاهو سغيل جدا لانه ماااااكنت بحب الرياضيات 😭. المهم انحبست كم شهر (قريت من كتاب اسمو Barron's GRE) وبديت اتدرب في المسائل الرياضية واحل القطع الانجليزية المطلوبة. طولتا فيهو شوية لكن الحمدلله امتحنتو وجبت ٣٠٦ من ٣٤٠ 😅
* لحد الوقت داك، ناس كثار كانو بقولو لي ده شنو البتعملي فيه ده و يضحكو فيني لمن اقول ليهم ماشة امريكا. الناس ديل انا مابلومهم لانه دي نظرتهم، لكن اووووعكم تخلو كلام زول يخش ليكم يغير حاجة انتو دايرين تصلو ليها واوعى يحبط من عزيمتكم!!
* يلا قمت رسلت شهاداتي عشان يعادلوها والحمدلله المعدل طلع قدرك قدرك 3.10 😂. لميت حاجاتي دي كلها والسي في ورسائل توصية من اساتذة وورقة بتكتب فيها انت ليه داير تقرا في الجامعة دي وليه اخترت الحاجة المعينة دي. والحمدلله جاني القبول بعد ٣ شهور. طبعا في اللحظة ديك انبسطت شديييييد وقلت خلااااص ماشة امريكا وبدت اجهز في هدوم البرد نظام هناك في ثلج وكده وناس بيتنا يضحكو فيني 😂.
* جاء وقت التقديم للفيزا. صراحة كنت متطمنة شديد لانه ورق القبول معاي وناس بيتنا الله يديهم العافية كانو داعمينني ماديا. يلا قبال اكمل ليكم دايرة اقول حاجة: ااي انا اهلي دعموني لكن ماشرط، ما تخلو العوائق المادية توقفكم قبال تبدو لانه في كم طريقة تانية. انا سمعت انه في بنوك ممكن تديك قرض دراسي وبتبدا تقسطو ليهم بعد تتخرج (وكثار من الطلبة الشفتهم هنا عملو كده). كمان في برامج بتاعة منح ممكن الزول يقدم ليها وديل بتكفلو بكل او بجزء كبير من المصاريف. فالواحد لو جاب القبول بتاع الجامعة انشاءالله بتتسهل ليهو بعد داك.
اتم ليكم: مشيت يوم الفيزا للمقابلة (كنت مقدمة لفيزا طالب student visa) ومشى معاي ابوي للسفارة الامريكية. سالوني كم سؤال وكنت بجاوب على قدر اسالتهم. ما اخدت معاهم خمسة دقايق وقالو لي الفيزا بتاعتك اترفضت! انا الساعة ديك المطرة صبت فيني طبعا! قلت ليهم اترفضت ليه السبب شنو؟! قالو لي اتفضلي الورق ده فيه كل المعلومات المطلوبة. طبعا نوع الورق البدوهو للناس البرفضوهم وكله كلام خارم بارم ما بوريك حاجة معينة. طلعت من السفارة ابكي وابوي يهدي فيني ويقول لي الفيهو الخير ربنا بسويهو. اليوم الكان اترفضت لي فيه الفيزا ده صراحة كان من اكثر اللحظات العصيبة في حياتي. الساعة ديك حسيت انه كل العملتو راح على الفاضي واني ضيعتا قريب سنتين من حياتي وناس دفعتنا فاتوني وانا اقرا وامتحن واخطط.
* قلت ماممكن استسلم سريع كده لازم على الاقل احاول تاني. قشقشت دموعي وفتشت النت قعدت اقرا عن الناس الاترفضت ليهم الفيزا وسبب الرفض شنو والزول ممكن يعمل شنو عشان يدوها ليه. طلع الامريكان ديل عندهم حاجة، ودي مهمة للناس الدايرين يقدمو لفيز دراسية: مع انك بعد تتخرج من عندهم في كذا طريقة رسمية انك انت تقعد بيها وتشتغل هناك، لكن في المقابلة حقت الفيزا لازم تتكلم وتوريهم انك ماشي لغرض الدراسة فقط وناوي ترجع بلدك بعد تنتهي وعندك خطط في بلدك وكده. جبت لي كم ورقة تاني واتدربت كويس على اني اقول شنو وسمعت نصايح الناس الكاتبين في النت، ومشيت المرة التانية والحمدلله وافقو لي وادوني الفيزا 😄🎉.
* وصلت امريكا شهر واحد ٢٠١٥ ونزلت الماستر طوالي. صراحة كنت خايفة اني ما اقدر انافس مع الامريكان وانه قرايتهم صعبة وكده، وانا ايام الجامعة في السودان كنت مع ناس البنشات الورا والقراية ايام الامتحانات بس 😅. فقمت لمن جيت بديت اقرا اول باول ولو في حاجة ماعارفاها بسال منها وبجيب مراجع خارجية وبقراها. اول امتحان لينا في الجامعة قفلتو وجبت الدرجة الكاملة لمن ماصدقت روحي 😅. واصلت على كده واي امتحان بعدو في كل المواد كنت بجيب اعلى درجة فيهو ومعدلي بقى 4.00 / 4.00 😄. قامو بعد السنة الاولى ادوني ناس الجامعة منحة وشغلوني مساعد تدريس معاهم فريحتا ناس البيت شوية من المصاريف 😊
* خلال فترتي في الجامعة حصلت على منحتين واربعة جوائز واختاروني لمنحة قدمت بيها البحث بتاعي في مؤتمر في كندا. حبيت اوريكم عشان تعرفو انو ما ضروري انك تكون من اوائل الجامعة عشان تمشي لقدام، اي زول ممكن يبقى من الأوائل. لو كان عندك عزيمة واصرار ممكن دايما تتطور وتنافس.
* انشاءالله قصتي تحمسكم واي واحد فيكم تتشجع وتواصل عشان تحقق الحاجة ال عايزاها.
🔴 كتبت د.مروة بابكر، أيضاً
"وللسنة الثالثة على التوالي، حصلت وبحمد الله على منحة زمالة منظمة شلمبيرجير العالمية، والتي تقدر بقيمة ٥٠ الف دولار في السنة دعمًا لمسيرتي في دكتوراة علوم المخ والأعصاب.
تحدثي لينا عن مسيرتك في الحافلة بالإنجازات؟
أريد استغلال هذه الفرصة لأذكر الجميع ان الاجتهاد هو مفتاح النجاح، فانا لم اكن من اوائل الدفعة عندما كنت في السودان، لكن عندما حضرت الى الولايات المتحدة الأمريكية خفت ان لا اصمد امام ابناء البلد الذين حصلوا على فرص تعليم افضل مقارنة بنا، فبذلت الوقت والجهد حتى حصلت على المعدل الكامل في السمستر الأول (4.00 GPA)، وتم تعييني كمساعد تدريس وانا ادرس الماجستير واختياري لجائزة افضل طالب ونشري لبحثين علميين، وقد كان هذا من أسباب قبولي لدراسة الدكتوراة.
ضاعفت العمل خلال الدكتوراة وحرصت دائما على احراز الدرجات الكاملة وحصلت على العديد من الجوائز، لكن قطعا كان افضلها هي منحة منظمة شلمبيرجير، وذلك لمعرفتي بمدى صعوبة الحصول عليها.
الكثير من الطلاب تواجههم بعض الصعوبات المالية عند التفكير في الدراسة في الخارج ،ما رأيك في ذلك ؟
"لا تدعوا الصعوبات المالية تقف امامكم حاجزا، فرغم ان دراستي للدكتوراة لمدة خمسة سنين تكلف مايفوق الربع مليون دولار(250 ألف دولار)، لكنني لم ادفع فيها قرشًا واحدا، حيث تكفلت الجامعة بجزء ومنظمة شلمبيرجير بالجزء الآخر"
كيف وصلتي إلى الذي انت فيه الآن ؟
"كان بامكان اي شخص فيكم ان يكون في مكاني. انا لم أولد في الولايات المتحدة وليس لدي جواز سفر غير السوداني، فقط حضرت للدراسة في عام ٢٠١٥، واستطعت ان اشق طريقي وتحقيق ما اصبو اليه، وبامكان اي شخص تطوير نفسه بالجد والاجتهاد سواء في العمل او في الدراسة"
ما هي النصيحة التي تقدمينها للراغبين بالدراسة في الخارج ؟
اذا كان هناك نصيحة اقدمها لكل الراغبين بالدراسة في الخارج ستكون تحسين اللغة الانجليزية، فهي مفتاح العلم والمعرفة في العصر الحالي.
ولازلنا نطمح لذلك اليوم الذي يكون فيه التعليم متوفرا لكل اطفال السودان في جميع الرقع الجغرافية"
تمت صياغة المحتوى من قبل المنصة لترتيب الأفكار.
🔴د.مروة بابكر
هي طبية سودانية وعالمة مخ وأعصاب مقيمة حاليا في هارتفورد بالولايات المتحدة، درست الطب في كل من جامعتي سنار والجزيرة ،تحضر حاليا للدكتوراة في تخصص المخ والأعصاب في جامعة هارتفورد.
🔴عن مؤسسة شلمبيرجير
تدعم كلية مؤسسة شلمبرجير للمستقبل النساء من الدول النامية في سعيهم للحصول على دراسات عليا متقدمة في العلوم والتكنولوجيا والهندسة والرياضيات في الجامعات الرائدة في جميع أنحاء العالم.
ليست هناك تعليقات:
إرسال تعليق