ياني أقراك مرة صاح
عكس احتشادك في الحضور
هل غاب معاك وعي الطريق
أم بيك زكاني الزمن
ماشيك و عارفك يا حريق
في يوم غمامتك بجن
فرهد غيابك أغنيات
ظلت أراضي اللقيا بور
بلقاك يا كل الطيور
مسجونة و الحرية سور
و بلقاك بيناتنا الثبات
و بيناتنا شمس البكرة في لحظة مخاض
طول الوجع رشح مواطن العافية فيك
خلاني أرجع و ابتديك
و أقراك من كل الجهات
و ما بين أقابلك و مشتهيك
كان حلمك الأول ترف
و كنت الصبية الغايبة في زحمة حجا و كلمة شرف
و كنت الزوايا الميتة في متحف خزف
و كنت الوصايا العشرة و اللون الشحيح
سميت مساحتك حكر كل البيحلموا بالشمش
هجرت من واقعك عبث
سكنت فيك ضد السكون كل الكان ممكن يكون
طارت ضفيرتك ليل غنا جدلة صبر و طولة نفس
و ما بين لقيتك و جيت عليك
كان عندي ليك بس نحنا و الجرح الثري
و خيبة أمل أم الشهيد في الكلمة و الوجه الجديد
و كان احتقان نبض الزمن
نوم الطفل فوق الدمن
يا صاحية بالحاصل علي
يا نايمة عن فقري البليد
سميتك منافيك الوطن
صبحت مناحتك نشيد
و قريتا طمن المدى
بايعني فوق أرضك شهيد
شاعر/عاطف خيري
اداء الفنان/ مصطفى سيد احمد
________
اختكم د.Mawada Mohamed
ليست هناك تعليقات:
إرسال تعليق