كتب الشاعر المرهف
_الدكتور معز عمر بخيت_
*هولاكو الجديد*
____________
لسه فيك أنا ما كتبت
ولسه ما عارف أقول
أحكي عن غدر الدعَامة
ولا عن فعل الفلول
عن وطن بنزف وببكي
عن جراح عطش الفصول
ولا عن خيرو الطمع
فيه فاقدين الأصول
أطنان دهب
ومراعي شاسعة
عن معادن وعن حقول
عن صمْغ عربي وعن نحاس
عن مواشي وعن أراضي
فيها يورانيوم وماس
فيها فدانات زراعة
بالملايين ما بتُقاس
لا في الخيال و لا بالعقول.
***
ونحن نقتل في بعضنا
نحرق البلد الجميلة.
نخنق النيل الحنيّن
ونسرق الفرحة النبيلة
بالسياسة وبالخساسة
بالصراعات الطويلة
عنصرية
سبهللية
ساكنة في جوف القبيلة
يا بلد عادوك أهلك
ويا وطن خذلوك ناسك
شالوا دنياك الظليلة
هتكوا عرضك
وفتكوا أرضك
بي صحاريها ونخيلا
بي ثمار الخير عليها
والشوارع يا حليلا
والبيوت العامرة إلفة
والرواكيب والنجيلة
والزغاريد والمشاعر
والزيارات للمقابر
وكل أحزانا النبيلة
لا فرح ظلل ديارنا
لا الحزن لملم جراحنا
لا طريقة ولا وسيلة
لا الذكر في ودنوباوي
لا صحت فينا الغناوي
لا بقت في الفكر حيلة.
***
وما فضل غير الأذية
نشنق الروح الشجية
وندفن الزمن السعيد
ذكرياتنا وأمنياتنا
الطيبة راحت
وانكسر بالحسرة عيد
واتمدد الموت والخراب
والبؤس والخوف والوعيد
ما فضل غير العذاب
ما بين تعدّي واغتصاب
ما بين تعب ودمار شديد
لكنو ده البلد الوحيد
الفيهو ما بموت الأمل
لا بهرب الوعد الأكيد
***
بكرة الزمن بنضف ويعود
نور الصباح والانفتاح
عهد الرشيد
نبني البلد بي جيل عظيم
وشباب مؤهل ونستعيد
نهضة بعانخي
وعهد تهراقا المجيد
عظمة وتآخي
نبني سودانا العتيد
نمشي لي نجم السما
ونطلع القمر البعيد
لا حزب فاسد لا مفاسد
لا حرامي ومستفيد
لا عصابات نهب شاسع
لا مطامع
وجنجويد
فاتوا التتر سبقوا المجوس
هولاكو في العصر الجديد
بكرة نبنيهو الوطن
خط مستقيم
صاحي وعنيد
ويبقى الزمن
صادق رحيم
بي كل حب
عامر مديد.
ليست هناك تعليقات:
إرسال تعليق