اطفال السودان

الي أريج   .. عصفورة الجنّة   بينما يسكننا الوجع الشديد ونحتضن مأساتنا 

الحمدلله  أن جنانه الفسيحة ستحتضنك وستسكنينها وذلك هو العزاء .     الله يصبر والدينك ويصبرنا نحن أهلك . 

 

غير أماتنا غير اخواتنا غير بنوتنا والله البكوكي رجال  أو كما ناح شقوري ود القوز ،  وإيه في ايدنا غير مانبكي مع شقوري وأخوانه من الشعراء والفنانين    

استميح الاخوة شقوري وعطا الله ومنعم في نشر هذه البكائية  والتعازي الحارة لكل أهلي بالقرير وكل البلد 

       **رحيل النسمة **

*مالك ياعصاري بلدنا*

*يبستى الصفق والعود*

*وماأمهلتى نفحة قوزنا*

*تمشي تلقط الواقود*

*ياما وياما غنيناكي*

*فى دارة ولاد مسعود* 

*والتمرات مدلى سبيطا*

*شبالاً معطر جود*

*وكل افراحنا عصرواية*

*خير تربالنا ..عصراوية*

*مرقة عيدنا ..عصراوية*

*لون قمحاتنا عصراوية*

*فوح برسيمنا عصراوية*

*والصبحية ..عصراوية*

*مالك يا عصاري قريرنا*

*سبتى سماحك المعهود*

*ومالك ياشمس مغربتي*

*قبال السميحة تعود*

*&&&&&*

*عصراوية كانت جمعة*

*في الحله البيوتا امان*

*الناس والنخل والقمرى*

*راجين سيرة العرسان*

*مليانى الدروب بالفرحة*

*من المتره.. للتيمان*

*وكل قريرنا مرتع خيرنا*

*في بحر العديل غرقان*

*وكنا ..وياحليلنا الكنا*

*زراعين السعد ريقان*

*وماقايلين حروف الفرحة*

*حالاً تتقلب احزان*

*تاريها المواجع فينا*

*تبحت لي مبيتا مكان*

*وتاريها النسيمة الحايمى*

*ماسيابالا فد عنوان*

*وكل الحلي كانت قايلى*

*انها فاتت الجيران*

*&&&&&*

*وينك يا اريج الحلى*

*نفحة عطرنا الفواح*

*يا الخليتى حالنا يلاقى*

*ليلاً مابعقبو صباح*

*ياوجعتنا ..*

*يافجعتنا ..*

*بعدك تاني كيف رجعتنا*

*للبلد البيوتا فُساح*

*وماظنينا تاني نغني*

*أو  نقدر وراكي نهني*

*من بعد اتعزقنا جراح*

*معقول يا اريج الحلى*

*ماحتعودي تانى تطلي*

*فى باقى الحياة الرحراح*

*يا الما فُتى عمر الزهرة*

*يا ام حيلاً تبتو النهرة*

*تبقى  ضحية للسفاح؟*

*&&&&&*

*خليتى الزمان محنان*

*ووقفتى الحقيقة سؤال*

*وعدّمتى العيون الدمعة*

*ما فضّل دمع ماسال*

*وغير اماتنا ..*

 *غير بنوتنا ..*

*والله البكوكي رجال*

*بكوك بالدمعة شان يفدوك*

*بكوكي على عرض مهتوك*

*وكل الببكي..ياهو   ابوك*

*وفوق الوجعة كانو جبال*

*ووجعك ياعروس النيل*

*مردًم فوق رقابنا تقيل*

*وعاد بالهينه مابنشال*

*وكل آهاتنا  يا نفحتنا*

 *مرقت في زفير وحّتنا*

*والكُربة العليك صحتنا*

 *من نوم الليالى الطال*

 *زفيناكي احلى عروس*

 *وجوانا الكتير  مدسوس* 

 *ينقِّر فينا  متل السوس*

*وتاني شنو الفضل يتقال*

*(شقوري)*