قصة شاب من الشباب

 مشيت أحد المطاعم دخلت وكل الترابيز مليانه المهم بفتش في حته اقعد فيها لقيت واحد قاعد في تربيزه وفي كراسي اتنين فاضيه.. قلت ليهو سلام عليكم. قال لي مرحب بطرف نخرتو المهم قلت ليهو لو سمحت ممكن كرسي قال لي لالا معاي ناس.. طوالي مشيت وبقيت واقف منتظر حد يقوم عشان اقعد.. المهم طلعت وقفت بره اشوف ليك عربيه توسان وقفت ونزلت منها بنت حلوه وجميله وخشت المطعم واشوفها ليك مشت على الزول الحماني الكرسي وسلمت عليهو وقعدت..طوالي مشيت عليهم قلت للزول ممكن الكرسي الفاضي ده قال لي لالا معانا زول تاني ورد بايخ كده المهم اسمع البنت قالت ليهو خلي يشيل الكرسي قال ليها لالا عمار صاحبي جايي.. في اللحظه دي في اتنين قامو والتربيزه قريبه من جماعتي ديل وطوالي قعدت.. المهم اسمع الولد قال ليها مالك اتأخر تي كده وانا كنت حا اركب ماسوره لأنه ما عندي ولا جنيه ارجع بيهو البيت.. البنت قالت ليهو معليش بس وصلت أمي ومرتضي اخوي المستشفى لأنه عمتي راقده هناك.. المهم طلبو الاكل وانا عرفت إنو الزول مفلس ولا تعريفه ما عنده وحماني الكرسي وصاحبه القالو ده لا جا ولا شفتو.. بعد شويه جابو الاكل والولد قام يغسل ايدو.. وأنا لقيت الفرصه طوالي أتلفت على البنت قلت ليها انتي اخت مرتضى. البنت اتخلعت وعاينت لي قالت لي اي بتعرفو قلت ليها أيوه صاحبي وسلامات لعمتو.. البنت بقت مضطربة وانا واصلت قلت ليها الغريبه مواعدني هنا نتقابل قال لي بس بصل المستشفى وبجيك نتغدي سوا.. البنت قامت مخلوعه وطوالي طلعت واشوفها ركبت العربيه وبسرعه مشت... الولد جا ما لقاها قعد وبقي يتلفت وطلع التلفون شكلو ضرب ليها واظنها ماردت عليهو.. المهم الزول بقى في حاله تانيه وسألني البنت الكانت هنا شفتها مشت وين. قلت ليهو قصدك اخت مرتضى صاحبي الولد عيونو مرقت زي الكبايه وبقي يعاين لي.. قلت ليهو هي طلعت مشت.. الزول وشو بقى اسود ويشيل ويضرب وهي ما بترد.. وطبعا ما اكل وانا قاعد اشوفو بعمل شنو لأنه ما عندو قروش يدفعها.. ضرب كم تلفون ومافي زول رد ليهو شكلو غير مرغوب فيهو.. طبعا في النهايه اشوفو قام براحه عايز يزوق لكن بتاع الكاشير شافو.. وتعال شوف الجرسه والفضايح..... 

تحميني الكرسي انا ياخ وعامل فيها قيس..